رائد
10-12-2008, 12:34 PM
السلام عليكم وحرمة الله وبركاته
هذه الاستفسارات منقولة من عدة مواقع منها للكاتب اسبيرانزا في موقع سفاري وغيرها من المواقع حبيت اجمعها لكم في موضوع واحد عشان تستفيدون منها ..........
وسوف تكون الاستفسارات عباره عن حلقات كل فترة بنزل مجموعه منها لتعم الافائدة
ان شاء الله تستفيدون منها..................
نبدأ:
اتمنى من الله ثم منك ان تنصحني وترشدني في موضوعي بكل عقل وانصاف وكلي امل فيك ان شاء الله ...
انا بروح لــ فانكوفر دراسه والغرض اصلا سياحه لمدة ثلاث اسابيع بس باخذ الفيزه دراسه وراح ادرس في معهد اسمه
YMCA سؤالى هل تنصحني بذهاب هناك هذه الايام مع قرب فصل الشتاء هناك ؟
وما الذي سوف احتاجه هناك ؟
وكم المصروف المعقول اللى يجب ان يكون معي هناك ؟ مع العلم ان السكن موجود والتذذكره فقط ( مبلغ سياحه ) ؟
ولى رجعه اخرى ان شاء الله معك ...
الرد على الاستفسار:
خي :
بعد التحية و الاحترام.
ما بين شهر 11 و 3 ميلادي بيكون فترة الشتاء في فانكوفير ، لكن و بما انك منت قاعد في المدينه الا 3 اسابيع فنشاءالله ماهو جايك اكتيئاب فترة الشتاء للي ما تعود على البرد و الثلج.
صحيح ان البرد في العاده في فانكوفير بسيط بالمقارنه بباقي اجزء كندا ولكن روحتك في الفصل هذا بيحرمك من جمال و سحر فانكوفير لو انك تروح الها ما بين شهر 3 و 9 ميلادي.
انا اعتقد و انت ابخص في الموضوع هذا ان فترة 3 اسابيع لدراسة اللغه الانجليزية غير كافيه بالمره و يمكن ما تستفيد منها.
لكن اذا كان الهدف الرئسي هو السياحه و من ثم الدراسه فلا ضرر من ذلك ، مع اني افضل انك تروح خلال فصل الربيع ( بس انتبه اذا رحت خلال فصل الربيع يمكن معاد ترجع من فانكوفير ، جمالها بيسحرك و هذا شي لا شك فيه).
اذا رحت في فصل الشتاء منت محتاج شي غير موجود في المدينه ، الملابس الشتويه عندهم افضل و ارخص.
المصاريف تعتمد عليك بالدرجه الاولي ، ولكن بختصار التكلفه خلال 3 اسابيع بدون سكن بتكون كما يلي:
( الدولار الكندي يعادل 3 ريال سعودي )
1) المواصلات:
- اذا حبيت تستأجر سياره ، التكلفه لسياره صغيره ( كرولا ، صني ، ماليبو ، فوكس ) بتكون في حدود 45 دولار في اليوم ، طبعاً بتحتاج الي رخصه دوليه او تكون رخصتك مكتوبه باللغه الانجليزيه ، و بتحتاج الي بطاقة ائتمان لستئجار السياره.
( تكلفة السياره لمدة 21 يوم بتكون 945 دولار). طبعاُ لا تنسي انك تحتاج تعبي بنزين و مع اسعار البترول المرتفعه بيكلفك البزين حدود 10 الي 15 دولار في اليوم.
- اذا منت مستاجر سياره ممكن تستخدم التكاسي و معدل سعر المشوار الواحد هو 10 الي 15 دولار.
- و ممكن تستخدم الباصات و القطارات ، سعر الباص للمنطقه الوحده 1.5 دولار ، و القطار الكهربائي نفس الشي تقريباً.
2) الاكل و الشرب:
على افتراض انك منت طابخ في البيت و بتعتمد على المطاعم ، تكلفة الاكل و الشرب بتكون كماء يلي:
- الفطور 10 دولار.
- الغداء 20 دولار.
العشاء 20 دولار.
طبعاً كل الاسعار هذي هي كمتوسط ولا تشمل الاكلات السريعه ( مكدونلدز و برقر كنق ... الخ) ، الاكلات السريعه تكلف في المتوسط 5 دولار.
و اذا كنت من محبي الاكل الصيني فهو ثاني ارخص اكل بعد السريع ، يعني ممكن تاكل في بوفيه مفتوح الين تشبع بحدود 10 دولار.
و فيه طبعاً مطاعم اغلى ولكن بجوده افضل.
التمشيات:
- اذا انت من محبي السينماء ، التذكره تكون في حدود 10 دولار للفلم و 5 دولار للفشار و المشروب.
- اغلب المتنزهات الموجوده في المدينه يكون الدخول لها مجاني ، و اذا كان فيه رسم دخول بيكون في حدود 15 دولار.
- التسوق مكلف ولكن انا ارا بانه ارخص من عندنا. و يعتمد على الشي اللي انت بتشتريه.
مدري اذا فيه شي ثاني.
انا عن نفسي اصرف معدل 100 دولار في اليوم من غير السياره.
يعني حدود 3000 دولار مصاريف انشاءالله تبسطك.
انت ما سألتني عن المعهد ، لكن قلت احط الرابط حقه اللي على الانترنت:
YMCA
************************************************** *************************************
الصراحة أنا من مدة ليست بالقربية وانا مطري اروح ادرس خارج المملكة ( دراسة لغة إنجليزية) بفترة من 4-6 أشهر , ولكن أنا منيب جزوم كل ما عزمت هونت أقول هل راح تكفي 6 شهور وتعرف ترطن انقليزي . مريت كذا مكتب ويبدو أنني استقريت على ثلاث دول يقال انها حاليا هي الانسب لدراسة اللغة ( بريطانيا -كندا - نيوزلندا)
وجمعت معلومات وافية عن كل دولة .... لكن يامشرفنا العزيز انت ذهبت وعايشت الواقع فأنا أفضل أني آخذ المعلومات منك ( هل كندا بيئة مناسبة لدراسة اللغة ) انا سألت وأرشدوني لمعهد ...ليس معهد يبدو انه كليه فيه قسم لتعليم اللغة اسمه ((( تراني ناسي الاسم بس احاول اتذكر لاتدقق على الاملاء))) tht candain collage وفيه كذا معهد سأبحث عنهم وأذكرهم لك . لكن سؤالي كيف مستوى المعيشة هناك للدارسين وكم التكلفة الشهرية التقريبية إذا عرفت ان خويك مايمسك الدراهم .
وانا لا أستغني عن النصح والإرشاد . والله يجعل هذا العمل في موازين حسناتك
الرد على الاستفسار:
اخي :
بعد التحية و الاحترام
ارا بانك حايراً في الاختيار بين دراسة اللغة الانجليزية في بريطانيا ، نيوزيلندا او كندا ، سوف استطيع مد يد العون لك بما لدي من قليل المعلومات عن معشوقتي كندا و بالاخص كندا. ( تراني قاعد اجرب لغتي العربية الفصحا ، و شكلي جبت العيد).
المهم نرجع لموضوعنا ، انا بعطيك بعض الاسباب اللي تجعل كندا هي الخيار الانسب للدراسة على وجه العموم:
- اول شي لازم تعرفه هو ان المعاهد الكنديه غيرخاضعه للتصنيف الرسمي للدولة ، يعني ما فيه شي رسمي ممكن تعتمد عليه عندما تقول ابغا افضل المعاهد الكندية ، كل اللي ممكن تعتمد عليه هو ما تراه بنفسك و ما يقال لك من ناس جربو المعاهد هذي.
- مقياس او الستاندرد التعليمي عندهم هو الاصعب و الاكثر دقه و بالطبع الافضل في العالم المتقدم.
- الحكومه الكنديه تصرف على التعليم اعلى نسبة بالمقارنه بدخلها القومي من اي دوله اخرا من دول العالم المتقدم.
- خريجي الجامعات و المعاهد الكنديه يعدون الافضل عالميين في مجال العلوم و الرياضيات.
- الشهادات الدراسيه الكنديه بانواعها في الكثير من التخصصات الدراسية هي الافضل و الاكثر قبولاً على مستوا العالم.
- النضام التعليمي و الصحي في كندا حسب دراسه اعدتها الامم المتحده هو ما بين افضل ثلاثه على مستوا العالم من عام 1994 و حتي الان.
- مستوا الجريمة و العنف عند الكنديين هو من الاقل في العالم المتقدم.
- التكوين السكاني الفريد من نوعه في جميع انحا كندا و بالذات في مدينة فانكوفير ، تبي تحصل ناس من كل عرق ولون و ديانه ، عشان كذا منت حاس انك غريب ولا شكلك يختلف عن غيرك.
- طبعاً بالاضافه لكل ما سبق ذكره ، عندهم شي يميزهم بزياده عن غيرهم و بالذات في مقاطعة برتش كلومبيا (مدينة فانكوفير هي اكبر مدينة في المقاطعه هذي) هو جمال الطبيعه الخلاب اللي يسحر و ياخذ الانفاس من روعته.
( طبعاً يمكن تقول انا وش دخلني في اغلب النقاط هذي ، انا بس حبيت اذكرها عشان يستفيد منها اي شخص يقراء الموضوع )
الحين بعد ما اقنعتك بالدراسة في كندا ( انشاءالله انك اقتنعت:think) ، لازم تختار اي مدينه ودك تدرس فيها.
طبعاً انساء المقاطعات الشرقيه لانهم كلهم يتكلمون فرنسي ( ما عدا مقاطعة نوفا سكوشا ، بس ترا اغلب سكان المقاطعه هذي من البيض و على طول بيدرون انك اجنبي) ، المقاطعات الوسطي من كندا و الشماليه الحقيقه ما انصح فيها لانك و بكل بساطه تبي تهج من البرد ( تخيل درجة الحراره تاصل الي ناقص 40 في الشتاء ، و اذا ما تعرف وش معنا ناقص 40 ، فعرف انها الدرجه اللي فيها اذانك تشقق من نفسها و يتجمد الدم قبل ما يطلع منها اذا ما دفيت اذانك و غطيتها).
بما انك اكيد استثنيت شرق و وسط كندا معاد يبقا الا المقاطعات الغربيه المطله على المحيط الاطلسي ، مقاطعة يوكون في الشمال بارده بالحيل و تكون مغطيه بالثلج اغلب فترات السنة ، معاد يبقا الا مقاطعة برتش كلومبيا.
مقاطعة برتش كلومبيا ماهي صغيره و تمتد بشكل عمودي من الشمال الي الجنوب ، المدن الموجوده في الشمال قريبه من القطب الشمالي يعني اكيد بارده ، معاد يبقا الا الجزء الجنوبي في المقاطعه ، و بما ان اكبر مدينه في المقاطعه هي مدينة فانكوفير و هي موجوده في الجنوب فمالك الا هي.
شفت وشلو انت الحين اقتنعت بمدينة فانكوفير ( انا كان ممكن اقولك فانكوفير على طول بس بغيتك تقتنع اول).
الحين بعد ما انت اخترت فانكوفير خلني اعطيك بعض المعلومات عنها:
- هي ثاني اجمل مدينة في العالم بعد جنيف السويسرية.( هذا حسب كلام الكنديين )
- المدينه تقع على امتداد جبال الروكي الامريكية ، عشان كذا اجزاء كبيره منها جبلية.
- عدد سكان المدينة في الوقت الحالي في حدود 2 مليون.
- عدد سكان المدينه يزيد سنوياً بما مقداره 20000 نسمه ( يعني الحق عليها قبل ما تزدحم ولا تلقالك ماطا قدم ).
- تعد المدينه ثالث اكبر مدينه من حيث عدد السكان في كندا بعد مونتريال و تورانتو.
- المدينه فيها ثاني اكبر جاليه صينيه في امريكا الشماليه ( يعني حدود 300000 الف صيني).
- عدد سكان المدينه من العرق الهندي في حدود 60000.
- عدد سكان المدينه من العرق الياباني في حدود 30000.
- و باقي السكان موزعين بين بيض من اوربا الغربية و الشرقيه ، ايران ، دول عربية و القليل من الاعراق الثانية.
و اخيراً وليس اخراً انصحك ما تروح الها لاني خايف انها تسحرك بجمالها ولعاد ترجع لديرتك و يدعون على اهلك.
تكلفة الدراسه و المعيشة في فانكوفير:
حسب معلومات الماخوذه من المواقع الرسمية للمدينة ، يقولون ان تكلفة الدراسه عندهم لمدة 6 اشهر ما بين 4000 و 15000 دولار حسب نوع الدراسة اللي انت تبحث عنها ( اللغة الانجليزيه بتكلف حدود 8000 دولار).
المعيشه حسب مصادر المدينة بتكلف لمدة 6 اشهر مل بين 2500 و 17000 دولار ( فرق السعر يكمن في نوع السكن و موقع السكن ، بالاضافه لاي نوع من الناس انت في الصرف).
انت تقول انك من النوع الصريف ، عشان كذا اتوقع انك تصرف حدود 100 الي 150 دولار في اليوم ( هذا ما يشمل السكن و السياره ). ممكن تستفيد من بعض المعلومات المذكوره في المشاركه السابقه.
بالنسبه للمعهد اللي انت ذكرته (The Canadian Collage) انا الحقيقه ما اعرفه ، ولا لقيت اي معلومات عنه على الانترنت ، اذا انت متاكد من الاسم انا ممكن ابحث عنه زياده و يمكن القاء معلومات عنه.
************************************************** *************************************
ارجو افادتي عن المعاهد اللي تدرس اللغة الانجليزية في مدينة تورانتو الكندية .
الرد على الاستفسار:
هذي مجموعة من المعاهد و مواقهم على الانترنت ، ارجو ان تكون ذو فايده.
معهد اكسيس للغات (http://www.accessenglish.com/)
معهد اي ال سي للغات (http://www.ilac.com/)
معهد ال اس اي للغات (http://www.lsi-canada.com/)
معهد بي ال اي للغات (http://www.pli.ca/)
جامعة كوينز (http://www.queensu.ca/)
جامعة ويسترن تاون (http://www.wtccanada.com/nsub/english/main.aspx)
طبعاً هذي مجموعة بسيطة من النعاهد و الجامعات و فيه الكثير غيرهم.
************************************************** *************************************
ما هو الفرق بين فانكوفير و تورانتو ؟؟؟؟
و أيهما أرخص و أحسن و الي السعودي يقدر يعيش فيها ؟؟؟؟
و أخر طلب : ليتك تعطيني تفاصيل البدايه الى انهايه ؟؟؟؟؟
( يعني من يوم ما أنوي السفر وفلوسي جاهزه الى ان أصل هناك)
يعني ( كيف ارسلهم الفلوس و كيف أطلع الفيزه و و كيف احجز المدرسه و الى ألخ ألخ ألخ ؟؟؟؟؟؟؟؟
و أشكرك شكرا كثيرا جدا جدا جدا " وجزاك الله الف خير "
تكفا تراني ما أحب المرمطه " مع العلم اني عمري ما سافرت خارج المملكة
و أبي رايك في هذا العهد http://www.visalanguage.com/
و كم يبيلي فلوس أذا أبي أجلس هناك 3 أشهر 25 ساعه في الاسبوع و مع تكليف السكن مع عائله مع مصروف متوسط
على بلاطه ( 15000) ريال تكفي " جمعتها ريال ريال عشان أحقق حلمي في الدراسه في كندا
أو انت ترشحلي مكان ثاني . .
و أشكرك شكرا كثيرا جدا جدا جدا " وجزاك الله الف خير "
حبيبي أش رايك في ottawa
شكل المعهد الي اعطيتك الرابط من أوتاوا
و الله محتااااار يا ناس ؟؟؟؟؟؟؟؟؟؟
الرد على الاستفسار:
والله ما ودي اكسر مجاديفك و احطم حلمك بكلامي ، لكن انت سألت ونا بجاوبك.
طبعاً كلامي بيكون مبني على 15000 ريال لمدة 3 اشهر ، اذا كان هذا صحيح بيكون معك فقط 5000 دولار كندي ، خلني اعطيك اسعار الدراسة في مونتريال و انت احكم.
1 ) الدراسة لمدة 12 اسبوع ( 25 ساعة في الاسبوع ) = 2800 دولار كندي ( 8400 ريال ).
2 ) السكن مع عائلة كندية مع الفطور و الغداء و العشاء لمدة 12 اسبوع = 2300 دولار كندي ( 6900 ريال ).
بكذا تكون فلوسك خلصت ولا بقاء معك فلوس للكتب و المواد الدراسية و المواصلات ، و اكيد انك تبي تمشاء و تروح و تجي.
كان والله ودي افيدك اكثر لكن زي منت شايف الفلوس اللي معك ما تكفي. ولا تفكر في فانكوفير لانها اغلى من تورانتو.
اذا تبي رائي الشخصي ، رح و ادرس لمدة 4 اسابيع فقط و انشاءالله فلوسك تكفي.
و بتكون التكلفة لمدة 4 اسابيع كماء يلي :
1 ) الدراسة لمدة 4 اسابيع ( 25 ساعة في الاسبوع ) = 975 دولار كندي ( 2925 ريال ).
2 ) السكن مع عائلة كندية مع الفطور و الغداء و العشاء لمدة 4 اسابيع = 2300 دولار كندي ( 2340 ريال ).
3 ) الكتب و المواد الدراسية 200 دولار كندي ( 600 ريال ).
4 ) المواصلات العامة 50 دولار كندي ( 150 ريال ).
يصير المجموع 6015 ريال ، يعني يبقاء معك 9000 ريال ، مبلغ حلو و ممتاز و بتدرس و تبسط في اونتاريو.
انت اكيد في 4 اسابيع او حتي 12 اسبوع منت متعلم انجليزي زين ولكن 4 اسابيع بتعطيك بعض الاساسيات و بتتعلم الكثير عن السفر و الدراسة في الخارج.
و اذا جاز لك الموضوع حاول تجمع مبلغ اكبر و ارجع كمل دراسة الانجليزي.
************************************************** *************************************
هل صحيح مايذكره بعض الاخوان ان هناك مشاكل في كندا ؟
وكيف المعامله هناك مع الشعب الكندي ؟ ومع الشرطة ؟ هل هي سلسه ام لا ؟
وكم تستغر الرحله من ساعة على الخطوط البريطانيه ؟
وعند سؤالى لمكتب الحجز ذكر لى في العودة من فانكوفر الى لندن سنتوقف لمدة يوم كامل السؤال هل ننتظر في المطار او يجب علينا
اذا اردنا الدخول الى لندن من وجود فيزاء ؟
مع انه ذكر لى انه سيوفر لى سكن في فندق في العودة لمدة يوم وانا لا احمل فيزاء الدخول لبريطانيا هل هذا صحيح ام لا ؟
مع الشكر لك ...
الرد على الاستفسار:
انا بعد ما قراءت مشاركتك ، دخلت على موقع الهجره و الجوازات البريطانية و كانت النعلومات اللي فيه كما يلي:
- اذا انت مسافر ترانزيت ولا انت طالع من المطار ما تحتاج فيزا.
- اذا رحلتك ترانزيت و بتطلع من المطار لمده تقل عن 24 ساعة ، ما تحتاج تاشيره.
اما سالفة انك لازم تقعد في لندن يوم قبل مواصلة الرحله ، فهذا يعتمد على اي ايام الاسبوع اللي انت مسافر فيها ، لانه من فانكوفير الي لندن فيه رحلتين يومياً و لكن من لندن للرياض ما فيه الا ثلاث رحلات اسبوعياً ، انت اطلع من فانكوفير في اليوم اللي يسبق موعد رحلة لندن للرياض ( يعني اذا الرحلة من لندن للرياض يوم الخميس ، اطلع من فانكوفير يوم الاربعاء). الا اذا كانت الخطوط البريطانية غيرت جدول رحلاتها ، فهاذا شي ماني متاكد منه.
ممكن انك تطلع من الرياض على الخطوط السعودية و من لندن تطلع على الخطوط البريطانية او الكندية ، و انشاءالله ما تنتضر يوم في لندن.
مدة الرحلة من الرياض الي لندن حوالي 6 ساعات ، و من لندن الي فانكوفير 9 ساعات.
انا على كثر سفراتي لكندا ما عمره صار للي مشكله او تم معاملتي بطريقة شينه ، مع العلم باني سافرت الي فانكوفير مرتين بعد احداث 11 سبتمبر.
************************************************** ************************************
السلام عليكم ورحمة الله وبركاته
.. ابغى اخذ رايكم في موضوع .. لو ابغى اخذ كورس انجليزي لمدة اربعة اسابيع عن طريق معهد ممتاز موجود في بلد يتكلم اهله الانجليزية بشكل عام وبشرط تكون التكاليف 12 الف شاملة الكورس وتذاكر الطيران وبرضو السكن ومصاريف المعيشة ... ياليت اسمع رايكم في اقرب وقت وعلى فكرة انا ناوي ابدا في نص ديسمبر الجاي
الرد على الاستفسار:
اخي :
خلني انا وياك نحسبها و نشوف كم تصير التكلفة لو انت درسة في مقاطعة البرتا الكندية ( المفروض المقاطعة هذي هي الارخص في كندا لان ما عندهم ضرايب) :
الدراسة لمدة 4 اسابيع ( 25 ساعة في الاسبوع ) مع السكن في منزل عائلة كندية و مع الاكل و الشرب = 5000 - 6000 ريال.
تذكرة الطيران حدود 4000 ريال.
المجموع 10000 ريال.
يعني اللي بيبقاء معك فقط 2000 ريال.
اعتذر منك اخوي تركي لكن اعتقد فلوسك ماهي كافية عشان تدرس في كندا او امريكا.
************************************************** ************************************
لدي بعض الإستفسارات وأود منك مساعدتي....
أنا أنوي أن أدرس لمدة 6 شهور - أو ممكن أكثر - في فانكوفر....
ما هو أفضل معهد هناك ,
وماهي الأجواء هناك بعد عيد الفطر ,
وكم التكلفة التقريبية - علماً بأنني لا أحب التمشيات - .
وماهي طريقة الدراسة , أي هل تنتهي دراستي بوصولي لمستوى معين أم مع إنتهاء المدة ,
ومن خلال معايشتك للشعب الكندي , ما هو رأيك في تعاملهم , علماً بأنني رجل ملتحي ,
طولت عليك وجزاك الله خيراً.....
الرد على الاستفسار:
اخي :
فيما يخص الدراسة ودي لو تقدر تعطيني زيادة معلومات عشان اقدر افيدك اكثر:
-) هل عندك حد معين للميزانية.
-) وشلون لغتك الانجليزية الان.
-) ترغب في السكن لوحدك او مع عائلة كندية.
-) هل يهمك تتعلم اللغة الانجليزية على اصولها في الجامعات الكندية الحكومية ، مع العلم بان الدراسة عندهم صعبة ولكن جداً مفيده.
بخصوص باقي اسئلتك:
-) بعد العيد بيوافق نهائة الخريف و دخول الشتي ، بيكون الجو بارد و ممكن ينزل ثلج و لكن الجو مقبول بالمقارنة بباقي اجزء كندا.
-) انا عن نفسي ما شفت من الشعب الكندي الا كل احترام و محبة. شعب ودود و بشوش ، من ناحية اللحية ما اعتقد ان فية مشكله خصوصاً ان المسلمين بعداد كبيره و اللحية تعود الكنديين شوفتها على المسلمبن و الهنود السيخ.
-) اما انك ما تحب التمشيات ، انا اقول لك انك اول ما تشوف فانكوفير و جمالها تبي تموت في التمشيات.
-) طريقة الدراسة تعتمد على نوع المعهد او الجامعة بالاضافة الي نوع الدورة اللي انت بتاخذها ، بالاضافه الي مستواك الحالي في اللغة.
-) التكلفة تختلف على حسب المكان اللي بتدرس فية ، ولكن و بصفة عامه الدراسة مع السكن و المعيشة بتكلفك حدود 5000 ريال شهري.
************************************************** ************************************
بسم الله الرحمن الرحيم..
اود اخي الكريم ان استفسر عن المعاهد واسمائها في فانكوفر ...انا اريد معهد يكون بأسعار جيده ولايشترط ان يكون ذا مواصفات تعليميه عاليه لانني طالب في كليه اللغات والهدف الرئيسي هو الاحتكاك لتطوير مهارات المحادثه ...علما انني اريد ان اذهب لفتره بين 10 الى 12 اسبوع..
ولك جزيل الشكر اخوي على مجهوداتك الرائعه
الرد:
اخي
بما انك طالب لغات ، تبي تعرف المعلومات المذكوره على الرابط التالي :
جميع المعاهد و الجامعات التي تدرس اللغة الانجليزية في مقاطعة برتش كلومبيا الكندية.
طبعاً فانكوفير تقع غي مقاطعة برتش كلومبيا.
************************************************** ************************************
انا راجعت الصفحات السابقه قبل مااكتب الاسئله ولم اجد المعهد المثالي..
على العموم اخوي هل تنصحني بالتسجيل عن طريق النت او عن طريق احد الوكالات..وهل هناك فرق في الاسعار...
واذا مافي ازعاج اخوي الحبي ابغى اشوف رايك عن السكن واسعار هذا الموقع هل هي مناسبه ام لاwww.homestayvancouvercanada.com وهل هو موقعه جيد في المدينه..
واريد الله لايهينك رأيك في هذا المعهد هل تعتقد انه مناسب www.bodwell.edu/language/message.html
اسف كثيرا على ازعاجك اخوي اتمنى انك تتحملني والف شكر..
الرد:
اخي :
تعذرني على التاخير في الرد.
بالنسبة للسكن على مرين درايف فهو في واحد من اجمل مناطق فانكوفير الغربية ، و ايضاً من اغلا المناطق.
بالنسبة للمعهد انا الحقيقه ما اعرفه، لكنه موجود في وسط المدينه ، ولا تنساء ان مستواء المعاهد في فانكوفير كلها محكومه بمواصفات شديده من قبل الحكومه.
************************************************** ************************************
الصراحه انا معجب بالسكن رغم انه على حسب كلامك غالي شوي ...طيب ممكن اسأل عن المتوسط الاسعار للسكن مع عائله
وبالنسبه للمعه فالصراحه اعجبني وانت ريحتني بأجابتك
الف شكر على سعه صدرك
الرد:
اخي :
اسعار السكن مع هائلة كنديه تختلف من منطقه الي اخراء ، لكن المتوسط في حدود 500 ريال سعودي في الاسبوع. و السعر هذا يشمل 3 وجبات في اليوم.
************************************************** *************************************
جزاك الله الف خييير
انا لي فتره ونا اطري كندا في بالي
وكنت ادخل واسوي سيرتش عىل الجامعات اللي هناك
ناوي اكمل ماستر في مجال غير مجال (البكالريوس) يعني ناوي اخذ الماستر في شي جديد
وفكرت بالاستثمار او الماركتنج .. مجرد اراء من هنا وهناك
وبحثت ودورت ... لكن مالقيت الجواب الشافي من جميع النواحي
لكن موضوعك افادني افاده حلوة حيل
وودي اسالك انا ناوي اروح بس مو الحين !! بعد سنه بإذن الله
وش افضل الجامعات اللي تختص بالاداره بشكل عام ... وباي مدينه .. التكاليف(مصروف ((يومي او شهري)).. جامعه) .. وايش نظامهم لو يجي واحد بيدرس ماجستير بغير تخصصه (يعني من جديد) سمعت انه ياخذ ساعات معينه في كلاسات اساسسيه بالاداره بعدين يكمل ماستر طبيعي ..
انشالله النقطه تكون واضحه وتفسرها لي على مايتبعونه
الف شكر لك وعلى جهدك بالمنتدى ومواضيعك ومغامراتك اللي اتابعها
ونبي نصايح من هنا وهناك من كندا .
الرد على الاستفسار:
اخي :
اولا انا تشرفت بمرورك و تشريفك لموضوعي هذ.
الجامعات الكنديه كثر التراب ، لكن المنطقه اللي بتدرس فيها هي اللي بتفرق معك.
معضم انحاء كندا بارده في فصل الشتاء ، انا عن تجربه لقيت المدن الموجوده على الساحل الغربي و بالذات في جنوب مقاطعة برتش كلومبيا هي الافضل من ناحية الجو ، صحيح ان الشتاء برد لكن برد معقول.
مشكلة مقاطعة برتش كلومبيا انها تعتبر الاغلى في كندا ، لكن بكل صراحه تستاهل كل قرش يندفع فيه، فتعدد الاعراق البشريه فيها يجعل منها مدينه دوليه فما تحس بالغربه فيها كثير، بالاضافه الي ان شعبه يحترم اللي يحترمه و امنه بشكل كبير ، طبعاً بالاضافه الي جمالها الخلاب بكل ما تعنيه الكلمه ، انا اعتبرها اجمل مدينه في العالم.
اكبر و افضل جامعة في كندا و في فانكوفير الواقعه في مقاطعة برتش كلومبيا هي جامعة برتش كلومبيا (UBC) ، و هذا رابط الجامعة:
http://www.welcome.ubc.ca
عندهم عدد كبير من التخصصات اللي يقدمون فيها شهادة الماجستير ، و على الرابط هذا بتلقاء قايمة البرامج اللي يقدمون فيها الماجستير:
http://www.grad.ubc.ca/apply/progra...sp?sort=masters
اختر البرنامج اللي ودك تكمل فيه و انا ازودك بالمعلومات اللي انت تبيها.
انا اخترت الجامعه هذي لك لاني اعرف انها من افضل الجامعات ولكن من اصعبها ، بس صدقني اذا درست عندهم بتحس انك ما عمرك رحت للمدرسه من قبل.
************************************************** *************************************
عندي استفسارات كثيررر لكن بموضوعك جاوبت عليهم اكثر من مره ومن نواحي مختلفه بعد,,
لكن من ناحية العائله الي تسكن معها وش وضعهم يعني بيكونون شيبان وكبار بالسن اقصد الام والاب وايضا اعضاء الاسره الاخرين اطفال او باعمارنا؟
والغرفه الي بتنام فيها عندهم كبيره صغيره وهل تاخذ راحتك فيها يعني تحط اغراض شخصيه لاب توب ساعات...الخ وتقدر توضا وتصلي بشكل عادي ؟؟ والحمام وانت بكرامه خاص لي او مشترك
واذا كان السكن مع العائله شامل الاكل والشرب ابيك توضح يعني الاكل يكون بموعد محدد والا متى ما بغيت تفتح الثلاجه وتاخذ الي تبي وتاكله على الطاوله او في غرفتك ؟ ومن ناحيه التلفزيون تقعد تسنتر قدامه عادي .؟
واخيرا اذا صرت بتروح معك واحد تقدر تسكن انت واياه بنفس الحاره او بيت قريبين من بعض؟ لان صعبه تصير انت واياه روم ميت بتروح كلها سواليف ومافي فايده( لكن القصد علشان المواصلات تكون مع بعض الروحه والجيه)
الجواب على الاستفسار:
هوم ستي ( Homestay ) هو الاسم الذي يطلق على برامج اقامة الطلاب الاجانب مع عائلاة كنديه و هو ايضاً اسم شركه كنديه متخصصه في الشي نفسه، يمكن اكون افضل ما في هذا البرنامج هو اختلاطك مع الكنديين اللي يتكلمون انجليزي فتستفيد منهم بالطريقه هذي ، ايضاً بتتعلم منهم طريقة الحياة الكنديه و التراث الكندي.
طبعاً العوائل الكنديه اللي ترغب في انك تقيم معهم لازم يتقيدون بعدة شروط مهمه و هي :
1) لازم يامنون لك غرفه خاصه مع مكان خاص للدراسه.
2) منزلهم لازم يكون نضيف و يكون ذو بيه مناسبه للدراسه و الاقامه.
3) ثلاث وجبات يوميه ( طبعاً انت ممكن تختار وجبتين او وجبه واحده) ولازم تكون الوجبات هذي مناسبه لك.
4) لازم يامنون لك مكان تغسل فيه ملابسك و تلفزيون و تلفون ( لكن ماهو شرط يكون خاص ، ممكن يكون مشترك).
5) لازم تتكلم العائله اللي انت بتسكن معها اللغه الانجليزيه بطلاقه.
6) لازم يكون قريب من منزل العائله وسئلة نقل عامه ( باص او قطار كهربائي).
اغلب العوائل اللي يقبلون باقامة طالب اجنبي معهم هم بحاجه للدخل الاضافي او تكون عائله بحاجه لشخص يونسهم و يملا عليهم البيت ، مثل كبار السن المتقاعدين.
انا اعرف واحد من الشباب سكن مع حرمه عجوز مدة سنه كامله و كانت هي بلحالها ، يوم توفت كتبت له في ورثها 100000 الف ريال ، لانها حبته و اعتبرته احد عيالها.
انت ممكن تختار نوع العائلة اللي ترغب في السكن معها من ناحية الديانه او الاصل ( المقصود بالاصل يعني هم من وين قبل ما يهاجرون الي كندا) ، ممكن تختار عدد الافراد و اذا ترغب يكون عندهم اطفال او حيونات اللايفه.
طبعاً المعهد اللي انت تسجل فيه ممكن يؤمن لك السكن مع عائلة او ممكن انك تختار شركه متخصصه في اسكان الطلاب الاجانب مع عوائل كنديه و الشركه هذي تساعدك في اختيار المعهد او الكلية المناسبه للدراسه.
النضام الكندي يتيح للطالب الاجنبي الدراسه فيها لمده لا تزيد عن 6 اشهر بتاشيرة زياره اذا زادت المده عن 6 اشهر يكون الطالب ملزم بالحصول على تاشيرة دراسه.
سعر الاقامه في احد هذه المسكن هي :
غرفه صغيره ما فيها تلفزيون و تقل جحر ضب ولا فيها الا الضعوي : 600 دولار كندي ( 1800 ريال سعودي) في الشهر شامله 3 وجبات.
http://www.50005000.com/Homestay/DSCF0390.jpg
http://www.50005000.com/Homestay/DSCF0399.jpg
هذي غرفة النوم.
http://www.50005000.com/Homestay/DSCF0391.jpg
http://www.50005000.com/Homestay/DSCF0418.jpg
و هذا المكتب في الغرفة.
http://www.50005000.com/Homestay/DSCF0398.jpg
هذا دالوب الملابس في الغرفة.
http://www.50005000.com/Homestay/DSCF0403.jpg
هذي صالة البيت.
http://www.50005000.com/Homestay/DSCF0409.jpg
و هذا المطبخ ، ممكن تطبخ فيه بنفسك بس لا تنساء تنضفة بعد ما تخلص.
http://www.50005000.com/Homestay/DSCF0412.jpg
http://www.50005000.com/Homestay/DSCF0414.jpg
هذا الحمام و هو مشترك مع باقي اهل البيت.
http://www.50005000.com/Homestay/DSCF0405.jpg
و هذا المنظر من خارج بلكونتك الخاصه.
اسعار الشركه هذي كما يلي:
غرفه كبيره فيها سرير كبير ، بلكونه ، مكتب ، 3 وجبات يوميه ، تلفزيون و فديو و توصيلة انترنت : 950 دولار كندي ( 2850 ريال سعودي ) اذا كان عمرك اقل من 18 سنه ، او 850دولار كندي ( 2370 ريال سعودي )اذا عمرك بين 19 و 24 سنه ، او 790 دولار كندي (2550 ريال سعودي) اذا عمرك فوق 24 سنه. كلها في الشهر الواحد.
بالنسبه لاستفساراتك:
-) العوائل اللي يتسكن معها مختلفه ، انت ممكن تحدد نوع العائله اللي انت تبغاها ( انا افضل انك تسكن مع شيبان ، يمكن يجيك ورث من وراهم)
-) نوع الغرفه تعتمد على اختيارك و المبلغ اللي انت مستعد تدفعه كل شهر.
-) بالنسبه للصلاة ، فهذا شي خاص فيك ولا احد يقدر يتدخل فيه ، و انت ممكن تطلب السكن مع عائلة مسلمه.
-) اغراضك الشخصيه انشاءالله ما عليها مشكله ، و انت بتقفل غرفتك كل ما طلعت منها. لكن يفضل انك تحط اغراضك الغاليه في مكان امن ( البنوك) او تاخذها معك كا ما طلعت من البيت ، الاب تاوب ما عندك فيه مشكله.
-) الاكل دايم محدد في وقت يحددونه لك العائله بس هذا ما يمنع انك تطبخ لنفسك لكن بشرط تشتري مقاضيك بنفسك.
-) اذا ما عندك تلفزيون خاص في الغرفه فتقدر تتفرج على تلفزيون البيت زي ما تبغا بالاتفاق مع العائله.
-) ممكن خويك يدبر له سكن في مكان قريب منك.
************************************************** *************************************
انا ابغا ادرس في كندا الماجستير طبعا ابغا مدينة فانكوفر وتخصص الي ابيه (حكومه الكترونيه اوادارة الجوده او التحقق من الجود) وابغا لي جامعه معترف فيها وحليوه يعني ميب صعبه جدا الدراسه فيها فكرت في برتش كلومبيا وافادني احد الأخوان بأنها صعبه جدا الدراسه فيها
الرد على الاستفسار:
بالنسبة لجامعات برتش كلومبيا ، فهي الحقيقة تعتبر الاصعب و في نفس الوقت الافضل على مستوا كندا.
الجامعات المعترف فيها هي :
جامعة برتش كلومبيا (UBC)
و جامعة سايمون فريزر (SFU)
و هذا رابط فيه معلومات عن الدراسة في كندا بالاضافة الي المعاهد و الجامعات:
http://www.studycanada.ca/arabic/index.htm
************************************************** ************************************
أنا أعمل في مركز طبي ومن احتكاكي بالموظفين لا أقول أجيد ولكن يمكن أقول لك أطقطق معهم في اللغة وش تقدر تنصحني به ياخوك هل أسافر أم لا وفي حال شورك علي بالسفر ماهي المدة التي تنصحني بها
الرد على الاستفسار:
انا اشور عليك تأخذ لك دورة في بلدك لمدة كم شهر ، و بعد ما تحس ان لغتك تحسنت ممكن تروح فانكوفر او اي مدينة كندية اخرا و تأخذ دورة مكثفة لمدة 3 اشهر و انشاءالله بتستفيد منها.
لكن احص انك تبعد عن المعاهد اللي يتواجد فيها عرب باعداد كبيرة.
************************************************** ************************************
في زميل لي في العمل يبغى يروح لدراسة بكالوريوس حاسب آلي ولكن عمره تقريباً ثلاثين سنة ومستواه في اللغة الإنجليزية تقدر عليه 3.5 من أربعة هو حاصل على دبلوم برمجة حاسب آلي في عام 2000م تقريباً لكنه ضيع كل الي درسه ( كل الي درسه امسح من راسه ) والرجال هاوي دراسه بشكل مهوب بسيط وحتى الحين عزوبي ما أدري تقدر تفيد بشيء أو تنصحه بطريقه معينه ؟
هل يهمة ان الجامعة تكون معتمدة من وزارة التعليم العالي السعودية او لا ، و سبب سؤالي هو انه في بالي معهد متخصص في مواضيع التكنلوجيا و الهندسة بانواعها و انا نفسي درست فيه لكنه غير معتمد من وزارة التعليم العالي السعودية مع انه من افضل المعاهد الي تقدم البكلريوسو الماجستير في المجالات هذي.
اما بالنسبة للغة الانجليزية فنشاءالله ما فيها مشكلة ، لان اغلب الجامعات و المعاهد يدرسون الطالب انجليزي و يرفعون من مستواه و بعدين يخلونه يكمل التخص عندهم.
تكملة لللسؤال اللي فوق:
ما يهمه إن كانت معترفة من وزارة التعليم العالي ولا لا وطلب مني بعد التأكيد على مسئلة العمر والرسوم السنوية للدراسة
العمر ما عندك مشكلة فيه و ممكن تدرس لو عمرك 100 سنة
انا اشور على خويك بمعهد برتش كلومبيا للتكنلوجيا (BCIT) ، و هذا رابطهم على النت:
http://www.bcit.ca/international/
بالنسبة للبكلريوس في الحاسب الالي فالمعهد عندهم العديد من التخصصات و بتحصلها على الرابط التالي:
http://www.bcit.ca/path/computing/programs/
شف تخصص الحاسب الالي اللي يناسب خويك و و اضغط على الرابط حقة الموجود في الصفحة اللي بتطلع لك و بتحصل كامل المعلومات عن التخصص و تكاليفه و طريقة التسجيل في المعهد.
************************************************** *************************************
السلام عليكم ورحمة الله وبركاته
ابشركم وبعد انتظار طويل وفحص طبي الـــــــــــــــــخ !
طلعنا التأشيرة الكندية ووجهتي ان شاء الله الى فانكوفــر الى معهد pli وادعولي بالتوفيق
ذهابي انا لتعلم اللغة الانكليزية وبعد مشاورات اخترنا المعهد هذا ومن لديه تعليق على هذا المعهد يا ليت يقوله لنا والي يبي موقعه هذا هو :http://www.pli.ca/
انا الان اريد نصايحكم ماذا احتاج في سفري حتى لا اندم هناك هذا واريد نصائح من تجاربكم في فانكوفر
وما تنصحوني هناك بزيارة ماذا وما ذا تنصحوني بأي برنامج اقوم العمل عليه هناك في غربتي
ارجو من الله ان يوفقني انا وياكم بما ينفع
وشكرً
التاشيرة جاهزة وباقي نصائحكم
لا تنسون ان تدعولي بالتوفيق في رحلتي الدراسية
الرد على الاستفسار:
اخي :
الحقيقه انت ما استفسرت عن شي محدد ، يعني استفساراتك كانت عامه. اللي اقدر افيدك فيه هو ما يلي:
1) مر على الموضوع التالي و انشاءالله بتلقاء فيه معلومات كثيرع عن فانكوفير:
اشتقت لكي يا فانكوفير.
2) هذي بعض المعلومات عن مطاعم و اسواق فانكوفير و بعض المعلومات العامه:
الاسواق في فانكوفير و المدن التبعه لها:
سوق الميترو تاون (Metrotown)
عنوان السوق ( 4700 Kingsway) في مدينة برنبي.
ويقع في مدينة برنبي واللي هي تعتبر جزء من مدينة فانكوفير ، والسوق هذا يعتبر اكبر مجمع تجاري في فانكوفير و في مقاطعة برتش كلومبيا و يتكون من حوالي 460 محل ، يوم زرتة عام 1994 كان اسمه (سوق ميترو تاون و ايتون) كان سوق ايتون اللي كان جزء من ميترو تاون شاغل مساحه كبيره من السوق ولكن قبل كم سنه قفل و انتقل لم سوق ثاني في الداون تاون ، طبعاُ سوق الميترو تاون توسع و اضيف له مجمع ثاني اسمه (الميتروبليكس) ، الميتروبليكس هذا عباره عن حوالي 15 صالة سينما كبيره و مجمع العاب الكترونيه ( اركيد ) الاركيد يتكون من دورين و يوجد في داخله مطعم و كل لعبه الكترونيه تخطر على البال. بالاضافه للاركيد و صالات السينماء فيه مجموعه من المحلات من ضمنها واحد من اكبر محلات الادوات و الملابس الرياضيه.
يقع على طرف السوق فندق الهولدي ان وهو فندق 3 نجوم و فندق الهيلتون قطع الشارع عن السوق وهو 4 نجوم.
الي يحب يكون قريب من السوق يفضل انه يسكن في احد الفندقين هذي و بيحصل كل ما يحتاج له.
يوجد في السوق كل ما يحتاج له الشخص ، فيه البنوك و المطاعم و السوبرماركت و كل انواع المحلات ، صدقوني لمن اقول ان الشخص يحتاج الي اكثر من ثلاثه ايام عشان يدور كل ارجاء السوق ، بس الله يعينكم على الضياع فيه لانه من كبره يضيع.
سوق الباسفيك سينتر (Pacific Centre ):
عنوان السوق : تقاطع شارع هو و جورجا في الداون تاون (Howe and West Gerogia).
و يعتبر ثاني اكبر سوق في فانكوفير ، يتكون السوق من حوالي 200 محل موزعة على 3 ادوار ، افضل مافيه سوق ايتون الموجود على طرفه الشمالي ، سوق ايتون هذا عندهم ماركات ملابس خياليه ما تلقاها في اي سوق ثاني في فانكوفير..
مشكلة السوق هذا و اللي ضيق صدري هو عملية انك لازم تدفع فلوس مقابل استخدام مواقف السيارات.
لكون السوق في الداون تاون جمبه مجموعه من الفنادق و الاسواق الاخري ، طبعاً اشهر فندق جمبه هو فندق الفور سيسونز.
سوق اوكريج سنتر (Oakridge Centre )
عنوان السوق : 650 West 41st Ave فانكوفير.
موقع السوق على خريطة فانكوفير.
السوق يتكون من دورين و فيه حدود 150 محل ، السوق صغير مقارنه بالمترو تاون و الباسفيك سينتر ، لكن فيه شي ماهو في السوقين هذي ، فيه محلات مجهورات و تحف من البلور تاخذ العقل ، انا ما عمري شفت على كثر ما ادور اسواق المجوهرات شي زي اللي شفته في السوق هذا. يا ناس عندهم مجوهرات خيال ولا في الاحلام ، ولا تحف البلور و الزجاج يافيها تفنن ماهو في الدنيا هذي.
و تعذروني لاني الحقيقه ما لقيت صور للسوق.
طبعاً فانكوفير و المدن التابعه لها مليانه اسواق بس انا بصراحة ما جاز للي الا الاسواق الثلاثه هذي.
بعض المطاعم في فانكوفير:
-) مطعم جو فورتيز (Joe Fortes) وهو موجود في وسط المدينة (Downtown) ويقدم تشكيلة من الاكل البحري والايطالي وانواع المشويات. اكلهم رايييق.
العنوان : عنوان المطعم: 777 Thurlow Street, Downtown Vancouver
الموقع الالكتروني : مطعم جو فورتيز
-) مطاعم ايرل (Earls Restaurant ) ويقدم تشكيلة واسعة من الماكولات الغربية.
المطعم له عدة فروع في مدينة فانكوفير.
الموقع الالكتروني : مطاعم ايرلز
-) مطاعم ريد رابن (Red Roban) ، ويقدم تشكيلة واسعة من الماكولات الغربية وعنهم بطاطس مقلي واجنحة دجاج عجيبة. المطعم هذا له فرع عند سوق الميترو تاون.
المطعم له عدة فروع في مدينة فانكوفير.
-) مطاعم بوستون بيزا (Boston Pizza) ويقدم بيزا رايعة ومجموعة كبيرة من الماكولات الغربية.
المطعم له عدة فروع في مدينة فانكوفير. وله فرع عند سوق الميترو تاون.
-) مطاعم بوت هاوس (Boat House Restaurant ) ويقدم ماكولات بحرية متنوعة ورائعة.
المطعم له عدة فروع في مدينة فانكوفير.
الموقع الالكتروني: مطعم البوت هاوس
-) مطعم نرفانا (Nirvana Restaurant ) ويقدم ماكولات هندية رائعة ولازم تجرب.
عنوان المطعم:2313 Main Street at 7th Avenue
الموقع الالكتروني : مطعم نرفانا
-) مطعم الشلي كلب (Chilli Club) ويقدم ماكولات تالندية ممتازة وعنده كل يوم احد غدا بوفية مفتوح.
المطعم موجود في وسط المدينة على شارع هورنبي وجمب البحر.
-) مطعم مصنع المكرونة (The Old Spaghetti Factory ) مطعم اكلة ايضاً رائع من الاكل الايطالي والغربي.
عنوان المطعم : في حي مدينة الغاز (Gastown)
-) مطعم انتونز (Antonz) مطعم اكل ايطالي ، لا يفوتكم بقوة بس تاكدو انكم ما تاكلون اي شي في اليوم الي انتم ناوين تروحن لة فية لان اكلهم كثير وصعب انكم تخلصونه.
عنوان المطعم: هو على شارع هيستنق الشرقي (Est. Hasting) في مدينة برنبي ، ما اذكر عنوانه بالضبط لاكن ممكن تاخذ العنوان من دليل التلفون.
طبعاً فانكوفير كلها مطاعم من كل شكل ولون. وفية خدمة اسمها تيكاوت تاكسي (Takeout takes)
وهم عبارة عن شركة توصل لك الاكل من اغلب مطاعم فانكوفير الي مكان سكنكم . وتراهم ممتازين وعرفهم زين لاني اشتغلت عندهم.
انا من محبي الاكل الصيني والياباني واذا تحبون عطيتكم اسامي وعناوين مجموعة منها.
بعض المعلومات العامه عن فانكوفير:
-) اذا الواحد حب يستاجر سيارة لازم ياخذ معها تامين شامل على السيارة وليس فقط تامين ضد الغير لانه لو لا قدر الله وحصل حادث التامين ضد الغير بيغطي فقط اضرار السيارة الثانية ونت بتدفع اضرار السياره الي معك.
-) السياره ما تقدر تستاجرها الا ببطاقة ائتمان (فيزا ، ماستر كارد و ما شابة ذلك).
-)اذا استاجرت السياره بستخدام بطاقة ائتمان ذهبية ممكن يعفيك المحل الي تستاجر من السياره من دفع قيمة التامين اليومي على السياره ، وهذا طبعاً يعتمد على مصدر البطاقة.
-) خريطة مدينة فانكوفير الي على شكل كتاب صغير ممتازه ولا يمكن تضيع اذا كنت تعرف تقراها بشكل صحيح.
-)اغلب شوارع فانكوفير لازم تدفع فلوس مقابل الوقوف فيها. وسعر الوقوف يختلف من شارع الي اخر.
-) ما بين الساعة 6 الي 9 الصباح و ما بين الساعة 3 الي 6 بعد الظهر يكون وقوف السيارات ممنوع في اغلب الشوارع و بالذات في وسط المدينة حتي لو كنت دافع فلوس مقابل الوقوف ، واذا نسيت توخر سيارتك من الطريق الي فية الوقوف ممنوع في الاوقات هذي الله يعينك على المخالفة والله يعينك تروح لم الشركة الي سحبت سيارتك و تدفع لهم قيمة السحب.
في مواقف السيارات الجانبية الي ما تكون على الطرق الرئسية يمنع الوقوف فيها بعد الساعة 12 باليل الي الساعة 6 الصباح.
-) قبل ما توقف سيارتك في اي مكان اقراء اللوحات وتاكد انه ممكن توقف سيارتك و الاوقات الي ممكن توقف فيها.
-) في وسط المدينة من الصعب جداً انك تحصل موقف للسياره و اذا حصلت موقف فهو في العاده غالي.
-) ممكن الواحد يستخدم وسايل المواصلات العامة مثل الباص و و القطارات الكهربائية الي تمشي فوق جسور خاصة على ارتفاع حوالي 8 متر من الارض.
-) اذا استخدمت الباص قيمة المشوار تعتمد على المسافه الي انت ناوي تقطعها ، اقل مشوار قيمتة دولار ونصف ، و اول ما تركب الباص فية صندوق جمب السواق تحط الفلوس فيها ، و لا تتوقع السواق يصرف لك اذا ما معك فكة مناسبة.
-) ذا استخدمت القطار الكهربائي لازم تشتري لك تذكرة من مكاين موجودة عند كل موقف للقطار ، وعرف انه ما فيه على القطار شخص ثابت يفتش على التذاكر ، يعني ممكن تكمل مشوارك واكثر من مشوار مندون ما يسالك احد عن تذكرة ، وممكن في اول مشوار يجيك واحد لابس ملابس شركة القطار ويسالك عن التذكرة واذا ما معك تذكرة او التذكرة الي معك ما تغطي المشوار الي انت قاطعة الله يعينك بتاخذ مخالفة و ممكن يودونك للشرطة.
-) اذا اكلت في مطعم او ما شابة ذلك يكون من الافضل انك تعطي بخشيش في حدود 5% من قيمة الفاتورة.
-) عندما يكون معك سيارة لازم تعرف ان الدوران للخلف بالسيارة ممنوع منع بات واذا ديورت ممكن تاخذ مخالفة ، اذا احتجت تديور ادخل احد الحارات وديور ورجع للخط الي انت تبية.
-) اذا معك سيارة و وصلت الي تقاطع رائسي او فرعي ولا فية اشارة فعرف ان اول واحد يوصل للتقاطع هو اول واحد يعدي التقاطع.
-) اذا معك سيارة وتمشي في خط مكون من اكثر من مسار وفجاة واحد من المسارات كان مسدود وحبيت تغير مسارك بعد ما توقف فعرف ان السيارات تبي توقف لك عشان تعدي ونت لازم تسوي زيهم.
-) اذا كانت اسنانك ماهي مضبوطة وتبي علاج عالجها في ديرتك لان عيادات الاسنان عندهم غالية جداً.
-) اذا تتعاطي علاج معين خذ معك الي يكفيك من بلدك لان العلاج عندهم لازم بوصفت طبيب.
-) اذا انت تدخن خذ معك الي يكفيك من الدخان لان الدخان الي عندهم ما هو نفسة الي في بلدك وتبي تشوف دخان غريب اول مرة تشوفة و نسبة النكوتين فية منخفضة جداً.
-) اذا جيت تشتري دخان اعرف انهم بيطلبون منك اثباتك الي يوضح فية عمرك.
-) اذا اخذت معك دخان كثير من بلدك اعرف انهم بياخذون منك ضريبة على الدخان هذا.
-) اذا جاك واحد في الشارع وطلب منك زقاره لا تعطية الا اذا انت متاكد انه فوق 18 سنة ولا ممكن تحاكم اذا مسكوك.
-) اعرف ان اغلب الهامبرغر عندهم ما يكون لحم بقر صافي و يكون مخلوط مع لحم خنزير.
-) اعرف ان البيتزا عندهم يكون فيها لحم خنزير اذا كان فيها ببيروني او سجق بالاضافة طبعاً للهام او البيكون.
-) اعرف ان البطاطس الشبس عندهم اغلبها فيها مشتقات من الخنزير.
-) اعرف ان اقصي سرعة عندهم في شوارعهم هي 50 كم في الساعة ، و اذا تعديت السرعة هذي بتاخذ مخالفة وقيمة المخالفة تعتمد على سرعتك عندما يصيدونك.
-) اعرف ان اقصي سرعة للسيارة في المناطق الي تكون حول المدارس هي 30 كم في الساعة اوقات الدراسة الرسمية.
3) المعهد اللي انت تتكلم عنه موجود في منطقة وسط المدينه (الداون تاون) على شارع بورارد ، المنطقه زحمة شوي و لكن هذا طبع كل وسط مدينه ، و الحقيقه ما عندي معلومات عنه.
الرابط التالي هو لصوره حيه و على الهواء مباشره لجسر بورارد في اتجاه وسط المدينة (الداون تاون) ، في نهائية الشارع بتلقاء المعهد حقك. الصوره هذي يتم تحديثها كل 15 دقيقه الين تضلم الدنيا ، فرق التوقيت بين السعودية و فانكوفير هو 11- ، يعني الساعة هندهم الان 8:45 في الصباح.
صوره مباشره من فانكوفير.
4) الجو في فانكوفير و الي السته ايام القادمه جميل و درجة الحراره في حدود 12 درجة مئوية و امطار كثيفة ، بس لا تخوفك الامطار ، فانكوفير دايم فيها مطر.
و هذا رابط يوضح لك درجة الحراره في فانكوفير لمدة 6 ايام قادمه و يتم تحديثه كا ساعة:
الطقس في فانكوفير
لا تشيل هم السفر الي فانكوفير ، انا متاكد انك بترتاح فيها و بتنهبل على جمالها، يمكن تتضايق في البدايه الين تتعرف لك على بعض الاصدقاء ، بس انشاءالله بعد كذا بتسلك معك الامور.
************************************************** *************************************
اسمع يالطيب
بصراحة انا ودي اروح لكندا وطبعا ما اقدر اروح كذا لازم ادبر لي عذر
والعذر بيكون دراسة
ما ادري يمكن القى دراسة لمدة قصيرة او لمدة طويلة لكن ايام قليلة بالاسبوع وياريت تكون 3 ايام
واظن نظام القيادة عندهم عادي مثلنا ماهو بالمعكوس ( انواع الحوادث بالتقاطعات)
ويمكن القى مدرس او يستحسن مدرسة خصوصية
لو بحثت عن فندق كم بتكون التكلفة بالشهر لفندق 5 او 4 نجوم
والفيزة للطالب تقدر تتنقل بها بالبلد عادي ولا لا
المعاهد تحاسب على الغياب ولا عادي
اللي بيروح كندا ما افضل طريق من الشرق ولا الغرب
وش اسوي كل محل اروح له احبه و اعشقه ، قلبي رهيف.
اجل متغوص ، لازم تجيب عذر ، اييييه يا الدنيا.
المهم ابعطيك اللي عندي و الباقي عليك.
شف سالفة انك تدرس فقط 3 ايام في الاسبوع ، ما اعتقد تمشي على السفاره الكندية و اكيد بيشوتونك.
انت خذ دراسه يوميه بمعدل 2.5 ساعة في اليوم خمسة ايام في الاسبوع ، او انت وش خسران خذ دراسه 5 ساعات في اليوم و خلهم يعطونك قبول و اول ما تاخذ الفيزا و تاصل فانكوفير امحطهم ركبه و لا تروح للمعهد ، او رح للمعهد و غير خطتك الدراسية او حتي غير المعهد ، في النهائه كل اللي انت بتخسره هو مبلغ 100 دولار كندي (300 ريال) قيمة التقدم بطلب التسجيل ، هو اهم شي للفيزا خطاب القبول.
و المدرسين الخاصين كثير و بتلقا منهم واجد ، لاكن اذا تطيع شوري وش تبي بهم ، اللغة و بتتعلمها من الاختلاط بالكنديين.
و اذا انت خايف تورط في الديره من ناحية الانجليزي او التجول ، تراني فاضي الين شهر 4 كان تبي خوي و دلوله ، بس ترا المصاريف عليك.
من ناحية الفندق و السكن ، السعر يعتمد على الموسم اللي بتسافر فيه ، يعني في الربيع و الصيف الفنادق غالية بسبب كثرة السياح.
بعدين انت تعال الاخ ولد نعمة ما يسكن الا في فنادق 4 او 5 نجوم ، الضاهر انت فنادق الفنس ماثره عليك ، ترا الفندق الكندي ابو نجمة يعادل فندق 4 نجوم في ديرة الفنس.
انت خذ لك غرفة في موتيل ( اللي غرفة على الشارع على طول) و بتطلع عليك في مثلاً البيست ويسترن بسعر 200 ريال في اليوم ، او رح للفندق اللي انا سكنت فيه و اول ما تاصل الفندق قابل راعية الهندي و قله انك خوي اسبرانزا و بيعطيك الغرفة بسعر 4000 ريال في الشهر ، و اذا قالك بشرط ما ينضفون غرفتك الا 3 مرات في الاسبوع قله عاد من زين هندياتكم اللي ينضفون ، بعدين رح و قردن الهنديات و عطهن دولارين و يلحسون لك غرفتك لحس.
و اذا انت مصر على 4 نجوم فيه فندق الهلتون سعر الليله عندهم بسعر 500 ريال و موقعهم حلو.
هذه الاستفسارات منقولة من عدة مواقع منها للكاتب اسبيرانزا في موقع سفاري وغيرها من المواقع حبيت اجمعها لكم في موضوع واحد عشان تستفيدون منها ..........
وسوف تكون الاستفسارات عباره عن حلقات كل فترة بنزل مجموعه منها لتعم الافائدة
ان شاء الله تستفيدون منها..................
نبدأ:
اتمنى من الله ثم منك ان تنصحني وترشدني في موضوعي بكل عقل وانصاف وكلي امل فيك ان شاء الله ...
انا بروح لــ فانكوفر دراسه والغرض اصلا سياحه لمدة ثلاث اسابيع بس باخذ الفيزه دراسه وراح ادرس في معهد اسمه
YMCA سؤالى هل تنصحني بذهاب هناك هذه الايام مع قرب فصل الشتاء هناك ؟
وما الذي سوف احتاجه هناك ؟
وكم المصروف المعقول اللى يجب ان يكون معي هناك ؟ مع العلم ان السكن موجود والتذذكره فقط ( مبلغ سياحه ) ؟
ولى رجعه اخرى ان شاء الله معك ...
الرد على الاستفسار:
خي :
بعد التحية و الاحترام.
ما بين شهر 11 و 3 ميلادي بيكون فترة الشتاء في فانكوفير ، لكن و بما انك منت قاعد في المدينه الا 3 اسابيع فنشاءالله ماهو جايك اكتيئاب فترة الشتاء للي ما تعود على البرد و الثلج.
صحيح ان البرد في العاده في فانكوفير بسيط بالمقارنه بباقي اجزء كندا ولكن روحتك في الفصل هذا بيحرمك من جمال و سحر فانكوفير لو انك تروح الها ما بين شهر 3 و 9 ميلادي.
انا اعتقد و انت ابخص في الموضوع هذا ان فترة 3 اسابيع لدراسة اللغه الانجليزية غير كافيه بالمره و يمكن ما تستفيد منها.
لكن اذا كان الهدف الرئسي هو السياحه و من ثم الدراسه فلا ضرر من ذلك ، مع اني افضل انك تروح خلال فصل الربيع ( بس انتبه اذا رحت خلال فصل الربيع يمكن معاد ترجع من فانكوفير ، جمالها بيسحرك و هذا شي لا شك فيه).
اذا رحت في فصل الشتاء منت محتاج شي غير موجود في المدينه ، الملابس الشتويه عندهم افضل و ارخص.
المصاريف تعتمد عليك بالدرجه الاولي ، ولكن بختصار التكلفه خلال 3 اسابيع بدون سكن بتكون كما يلي:
( الدولار الكندي يعادل 3 ريال سعودي )
1) المواصلات:
- اذا حبيت تستأجر سياره ، التكلفه لسياره صغيره ( كرولا ، صني ، ماليبو ، فوكس ) بتكون في حدود 45 دولار في اليوم ، طبعاً بتحتاج الي رخصه دوليه او تكون رخصتك مكتوبه باللغه الانجليزيه ، و بتحتاج الي بطاقة ائتمان لستئجار السياره.
( تكلفة السياره لمدة 21 يوم بتكون 945 دولار). طبعاُ لا تنسي انك تحتاج تعبي بنزين و مع اسعار البترول المرتفعه بيكلفك البزين حدود 10 الي 15 دولار في اليوم.
- اذا منت مستاجر سياره ممكن تستخدم التكاسي و معدل سعر المشوار الواحد هو 10 الي 15 دولار.
- و ممكن تستخدم الباصات و القطارات ، سعر الباص للمنطقه الوحده 1.5 دولار ، و القطار الكهربائي نفس الشي تقريباً.
2) الاكل و الشرب:
على افتراض انك منت طابخ في البيت و بتعتمد على المطاعم ، تكلفة الاكل و الشرب بتكون كماء يلي:
- الفطور 10 دولار.
- الغداء 20 دولار.
العشاء 20 دولار.
طبعاً كل الاسعار هذي هي كمتوسط ولا تشمل الاكلات السريعه ( مكدونلدز و برقر كنق ... الخ) ، الاكلات السريعه تكلف في المتوسط 5 دولار.
و اذا كنت من محبي الاكل الصيني فهو ثاني ارخص اكل بعد السريع ، يعني ممكن تاكل في بوفيه مفتوح الين تشبع بحدود 10 دولار.
و فيه طبعاً مطاعم اغلى ولكن بجوده افضل.
التمشيات:
- اذا انت من محبي السينماء ، التذكره تكون في حدود 10 دولار للفلم و 5 دولار للفشار و المشروب.
- اغلب المتنزهات الموجوده في المدينه يكون الدخول لها مجاني ، و اذا كان فيه رسم دخول بيكون في حدود 15 دولار.
- التسوق مكلف ولكن انا ارا بانه ارخص من عندنا. و يعتمد على الشي اللي انت بتشتريه.
مدري اذا فيه شي ثاني.
انا عن نفسي اصرف معدل 100 دولار في اليوم من غير السياره.
يعني حدود 3000 دولار مصاريف انشاءالله تبسطك.
انت ما سألتني عن المعهد ، لكن قلت احط الرابط حقه اللي على الانترنت:
YMCA
************************************************** *************************************
الصراحة أنا من مدة ليست بالقربية وانا مطري اروح ادرس خارج المملكة ( دراسة لغة إنجليزية) بفترة من 4-6 أشهر , ولكن أنا منيب جزوم كل ما عزمت هونت أقول هل راح تكفي 6 شهور وتعرف ترطن انقليزي . مريت كذا مكتب ويبدو أنني استقريت على ثلاث دول يقال انها حاليا هي الانسب لدراسة اللغة ( بريطانيا -كندا - نيوزلندا)
وجمعت معلومات وافية عن كل دولة .... لكن يامشرفنا العزيز انت ذهبت وعايشت الواقع فأنا أفضل أني آخذ المعلومات منك ( هل كندا بيئة مناسبة لدراسة اللغة ) انا سألت وأرشدوني لمعهد ...ليس معهد يبدو انه كليه فيه قسم لتعليم اللغة اسمه ((( تراني ناسي الاسم بس احاول اتذكر لاتدقق على الاملاء))) tht candain collage وفيه كذا معهد سأبحث عنهم وأذكرهم لك . لكن سؤالي كيف مستوى المعيشة هناك للدارسين وكم التكلفة الشهرية التقريبية إذا عرفت ان خويك مايمسك الدراهم .
وانا لا أستغني عن النصح والإرشاد . والله يجعل هذا العمل في موازين حسناتك
الرد على الاستفسار:
اخي :
بعد التحية و الاحترام
ارا بانك حايراً في الاختيار بين دراسة اللغة الانجليزية في بريطانيا ، نيوزيلندا او كندا ، سوف استطيع مد يد العون لك بما لدي من قليل المعلومات عن معشوقتي كندا و بالاخص كندا. ( تراني قاعد اجرب لغتي العربية الفصحا ، و شكلي جبت العيد).
المهم نرجع لموضوعنا ، انا بعطيك بعض الاسباب اللي تجعل كندا هي الخيار الانسب للدراسة على وجه العموم:
- اول شي لازم تعرفه هو ان المعاهد الكنديه غيرخاضعه للتصنيف الرسمي للدولة ، يعني ما فيه شي رسمي ممكن تعتمد عليه عندما تقول ابغا افضل المعاهد الكندية ، كل اللي ممكن تعتمد عليه هو ما تراه بنفسك و ما يقال لك من ناس جربو المعاهد هذي.
- مقياس او الستاندرد التعليمي عندهم هو الاصعب و الاكثر دقه و بالطبع الافضل في العالم المتقدم.
- الحكومه الكنديه تصرف على التعليم اعلى نسبة بالمقارنه بدخلها القومي من اي دوله اخرا من دول العالم المتقدم.
- خريجي الجامعات و المعاهد الكنديه يعدون الافضل عالميين في مجال العلوم و الرياضيات.
- الشهادات الدراسيه الكنديه بانواعها في الكثير من التخصصات الدراسية هي الافضل و الاكثر قبولاً على مستوا العالم.
- النضام التعليمي و الصحي في كندا حسب دراسه اعدتها الامم المتحده هو ما بين افضل ثلاثه على مستوا العالم من عام 1994 و حتي الان.
- مستوا الجريمة و العنف عند الكنديين هو من الاقل في العالم المتقدم.
- التكوين السكاني الفريد من نوعه في جميع انحا كندا و بالذات في مدينة فانكوفير ، تبي تحصل ناس من كل عرق ولون و ديانه ، عشان كذا منت حاس انك غريب ولا شكلك يختلف عن غيرك.
- طبعاً بالاضافه لكل ما سبق ذكره ، عندهم شي يميزهم بزياده عن غيرهم و بالذات في مقاطعة برتش كلومبيا (مدينة فانكوفير هي اكبر مدينة في المقاطعه هذي) هو جمال الطبيعه الخلاب اللي يسحر و ياخذ الانفاس من روعته.
( طبعاً يمكن تقول انا وش دخلني في اغلب النقاط هذي ، انا بس حبيت اذكرها عشان يستفيد منها اي شخص يقراء الموضوع )
الحين بعد ما اقنعتك بالدراسة في كندا ( انشاءالله انك اقتنعت:think) ، لازم تختار اي مدينه ودك تدرس فيها.
طبعاً انساء المقاطعات الشرقيه لانهم كلهم يتكلمون فرنسي ( ما عدا مقاطعة نوفا سكوشا ، بس ترا اغلب سكان المقاطعه هذي من البيض و على طول بيدرون انك اجنبي) ، المقاطعات الوسطي من كندا و الشماليه الحقيقه ما انصح فيها لانك و بكل بساطه تبي تهج من البرد ( تخيل درجة الحراره تاصل الي ناقص 40 في الشتاء ، و اذا ما تعرف وش معنا ناقص 40 ، فعرف انها الدرجه اللي فيها اذانك تشقق من نفسها و يتجمد الدم قبل ما يطلع منها اذا ما دفيت اذانك و غطيتها).
بما انك اكيد استثنيت شرق و وسط كندا معاد يبقا الا المقاطعات الغربيه المطله على المحيط الاطلسي ، مقاطعة يوكون في الشمال بارده بالحيل و تكون مغطيه بالثلج اغلب فترات السنة ، معاد يبقا الا مقاطعة برتش كلومبيا.
مقاطعة برتش كلومبيا ماهي صغيره و تمتد بشكل عمودي من الشمال الي الجنوب ، المدن الموجوده في الشمال قريبه من القطب الشمالي يعني اكيد بارده ، معاد يبقا الا الجزء الجنوبي في المقاطعه ، و بما ان اكبر مدينه في المقاطعه هي مدينة فانكوفير و هي موجوده في الجنوب فمالك الا هي.
شفت وشلو انت الحين اقتنعت بمدينة فانكوفير ( انا كان ممكن اقولك فانكوفير على طول بس بغيتك تقتنع اول).
الحين بعد ما انت اخترت فانكوفير خلني اعطيك بعض المعلومات عنها:
- هي ثاني اجمل مدينة في العالم بعد جنيف السويسرية.( هذا حسب كلام الكنديين )
- المدينه تقع على امتداد جبال الروكي الامريكية ، عشان كذا اجزاء كبيره منها جبلية.
- عدد سكان المدينة في الوقت الحالي في حدود 2 مليون.
- عدد سكان المدينه يزيد سنوياً بما مقداره 20000 نسمه ( يعني الحق عليها قبل ما تزدحم ولا تلقالك ماطا قدم ).
- تعد المدينه ثالث اكبر مدينه من حيث عدد السكان في كندا بعد مونتريال و تورانتو.
- المدينه فيها ثاني اكبر جاليه صينيه في امريكا الشماليه ( يعني حدود 300000 الف صيني).
- عدد سكان المدينه من العرق الهندي في حدود 60000.
- عدد سكان المدينه من العرق الياباني في حدود 30000.
- و باقي السكان موزعين بين بيض من اوربا الغربية و الشرقيه ، ايران ، دول عربية و القليل من الاعراق الثانية.
و اخيراً وليس اخراً انصحك ما تروح الها لاني خايف انها تسحرك بجمالها ولعاد ترجع لديرتك و يدعون على اهلك.
تكلفة الدراسه و المعيشة في فانكوفير:
حسب معلومات الماخوذه من المواقع الرسمية للمدينة ، يقولون ان تكلفة الدراسه عندهم لمدة 6 اشهر ما بين 4000 و 15000 دولار حسب نوع الدراسة اللي انت تبحث عنها ( اللغة الانجليزيه بتكلف حدود 8000 دولار).
المعيشه حسب مصادر المدينة بتكلف لمدة 6 اشهر مل بين 2500 و 17000 دولار ( فرق السعر يكمن في نوع السكن و موقع السكن ، بالاضافه لاي نوع من الناس انت في الصرف).
انت تقول انك من النوع الصريف ، عشان كذا اتوقع انك تصرف حدود 100 الي 150 دولار في اليوم ( هذا ما يشمل السكن و السياره ). ممكن تستفيد من بعض المعلومات المذكوره في المشاركه السابقه.
بالنسبه للمعهد اللي انت ذكرته (The Canadian Collage) انا الحقيقه ما اعرفه ، ولا لقيت اي معلومات عنه على الانترنت ، اذا انت متاكد من الاسم انا ممكن ابحث عنه زياده و يمكن القاء معلومات عنه.
************************************************** *************************************
ارجو افادتي عن المعاهد اللي تدرس اللغة الانجليزية في مدينة تورانتو الكندية .
الرد على الاستفسار:
هذي مجموعة من المعاهد و مواقهم على الانترنت ، ارجو ان تكون ذو فايده.
معهد اكسيس للغات (http://www.accessenglish.com/)
معهد اي ال سي للغات (http://www.ilac.com/)
معهد ال اس اي للغات (http://www.lsi-canada.com/)
معهد بي ال اي للغات (http://www.pli.ca/)
جامعة كوينز (http://www.queensu.ca/)
جامعة ويسترن تاون (http://www.wtccanada.com/nsub/english/main.aspx)
طبعاً هذي مجموعة بسيطة من النعاهد و الجامعات و فيه الكثير غيرهم.
************************************************** *************************************
ما هو الفرق بين فانكوفير و تورانتو ؟؟؟؟
و أيهما أرخص و أحسن و الي السعودي يقدر يعيش فيها ؟؟؟؟
و أخر طلب : ليتك تعطيني تفاصيل البدايه الى انهايه ؟؟؟؟؟
( يعني من يوم ما أنوي السفر وفلوسي جاهزه الى ان أصل هناك)
يعني ( كيف ارسلهم الفلوس و كيف أطلع الفيزه و و كيف احجز المدرسه و الى ألخ ألخ ألخ ؟؟؟؟؟؟؟؟
و أشكرك شكرا كثيرا جدا جدا جدا " وجزاك الله الف خير "
تكفا تراني ما أحب المرمطه " مع العلم اني عمري ما سافرت خارج المملكة
و أبي رايك في هذا العهد http://www.visalanguage.com/
و كم يبيلي فلوس أذا أبي أجلس هناك 3 أشهر 25 ساعه في الاسبوع و مع تكليف السكن مع عائله مع مصروف متوسط
على بلاطه ( 15000) ريال تكفي " جمعتها ريال ريال عشان أحقق حلمي في الدراسه في كندا
أو انت ترشحلي مكان ثاني . .
و أشكرك شكرا كثيرا جدا جدا جدا " وجزاك الله الف خير "
حبيبي أش رايك في ottawa
شكل المعهد الي اعطيتك الرابط من أوتاوا
و الله محتااااار يا ناس ؟؟؟؟؟؟؟؟؟؟
الرد على الاستفسار:
والله ما ودي اكسر مجاديفك و احطم حلمك بكلامي ، لكن انت سألت ونا بجاوبك.
طبعاً كلامي بيكون مبني على 15000 ريال لمدة 3 اشهر ، اذا كان هذا صحيح بيكون معك فقط 5000 دولار كندي ، خلني اعطيك اسعار الدراسة في مونتريال و انت احكم.
1 ) الدراسة لمدة 12 اسبوع ( 25 ساعة في الاسبوع ) = 2800 دولار كندي ( 8400 ريال ).
2 ) السكن مع عائلة كندية مع الفطور و الغداء و العشاء لمدة 12 اسبوع = 2300 دولار كندي ( 6900 ريال ).
بكذا تكون فلوسك خلصت ولا بقاء معك فلوس للكتب و المواد الدراسية و المواصلات ، و اكيد انك تبي تمشاء و تروح و تجي.
كان والله ودي افيدك اكثر لكن زي منت شايف الفلوس اللي معك ما تكفي. ولا تفكر في فانكوفير لانها اغلى من تورانتو.
اذا تبي رائي الشخصي ، رح و ادرس لمدة 4 اسابيع فقط و انشاءالله فلوسك تكفي.
و بتكون التكلفة لمدة 4 اسابيع كماء يلي :
1 ) الدراسة لمدة 4 اسابيع ( 25 ساعة في الاسبوع ) = 975 دولار كندي ( 2925 ريال ).
2 ) السكن مع عائلة كندية مع الفطور و الغداء و العشاء لمدة 4 اسابيع = 2300 دولار كندي ( 2340 ريال ).
3 ) الكتب و المواد الدراسية 200 دولار كندي ( 600 ريال ).
4 ) المواصلات العامة 50 دولار كندي ( 150 ريال ).
يصير المجموع 6015 ريال ، يعني يبقاء معك 9000 ريال ، مبلغ حلو و ممتاز و بتدرس و تبسط في اونتاريو.
انت اكيد في 4 اسابيع او حتي 12 اسبوع منت متعلم انجليزي زين ولكن 4 اسابيع بتعطيك بعض الاساسيات و بتتعلم الكثير عن السفر و الدراسة في الخارج.
و اذا جاز لك الموضوع حاول تجمع مبلغ اكبر و ارجع كمل دراسة الانجليزي.
************************************************** *************************************
هل صحيح مايذكره بعض الاخوان ان هناك مشاكل في كندا ؟
وكيف المعامله هناك مع الشعب الكندي ؟ ومع الشرطة ؟ هل هي سلسه ام لا ؟
وكم تستغر الرحله من ساعة على الخطوط البريطانيه ؟
وعند سؤالى لمكتب الحجز ذكر لى في العودة من فانكوفر الى لندن سنتوقف لمدة يوم كامل السؤال هل ننتظر في المطار او يجب علينا
اذا اردنا الدخول الى لندن من وجود فيزاء ؟
مع انه ذكر لى انه سيوفر لى سكن في فندق في العودة لمدة يوم وانا لا احمل فيزاء الدخول لبريطانيا هل هذا صحيح ام لا ؟
مع الشكر لك ...
الرد على الاستفسار:
انا بعد ما قراءت مشاركتك ، دخلت على موقع الهجره و الجوازات البريطانية و كانت النعلومات اللي فيه كما يلي:
- اذا انت مسافر ترانزيت ولا انت طالع من المطار ما تحتاج فيزا.
- اذا رحلتك ترانزيت و بتطلع من المطار لمده تقل عن 24 ساعة ، ما تحتاج تاشيره.
اما سالفة انك لازم تقعد في لندن يوم قبل مواصلة الرحله ، فهذا يعتمد على اي ايام الاسبوع اللي انت مسافر فيها ، لانه من فانكوفير الي لندن فيه رحلتين يومياً و لكن من لندن للرياض ما فيه الا ثلاث رحلات اسبوعياً ، انت اطلع من فانكوفير في اليوم اللي يسبق موعد رحلة لندن للرياض ( يعني اذا الرحلة من لندن للرياض يوم الخميس ، اطلع من فانكوفير يوم الاربعاء). الا اذا كانت الخطوط البريطانية غيرت جدول رحلاتها ، فهاذا شي ماني متاكد منه.
ممكن انك تطلع من الرياض على الخطوط السعودية و من لندن تطلع على الخطوط البريطانية او الكندية ، و انشاءالله ما تنتضر يوم في لندن.
مدة الرحلة من الرياض الي لندن حوالي 6 ساعات ، و من لندن الي فانكوفير 9 ساعات.
انا على كثر سفراتي لكندا ما عمره صار للي مشكله او تم معاملتي بطريقة شينه ، مع العلم باني سافرت الي فانكوفير مرتين بعد احداث 11 سبتمبر.
************************************************** ************************************
السلام عليكم ورحمة الله وبركاته
.. ابغى اخذ رايكم في موضوع .. لو ابغى اخذ كورس انجليزي لمدة اربعة اسابيع عن طريق معهد ممتاز موجود في بلد يتكلم اهله الانجليزية بشكل عام وبشرط تكون التكاليف 12 الف شاملة الكورس وتذاكر الطيران وبرضو السكن ومصاريف المعيشة ... ياليت اسمع رايكم في اقرب وقت وعلى فكرة انا ناوي ابدا في نص ديسمبر الجاي
الرد على الاستفسار:
اخي :
خلني انا وياك نحسبها و نشوف كم تصير التكلفة لو انت درسة في مقاطعة البرتا الكندية ( المفروض المقاطعة هذي هي الارخص في كندا لان ما عندهم ضرايب) :
الدراسة لمدة 4 اسابيع ( 25 ساعة في الاسبوع ) مع السكن في منزل عائلة كندية و مع الاكل و الشرب = 5000 - 6000 ريال.
تذكرة الطيران حدود 4000 ريال.
المجموع 10000 ريال.
يعني اللي بيبقاء معك فقط 2000 ريال.
اعتذر منك اخوي تركي لكن اعتقد فلوسك ماهي كافية عشان تدرس في كندا او امريكا.
************************************************** ************************************
لدي بعض الإستفسارات وأود منك مساعدتي....
أنا أنوي أن أدرس لمدة 6 شهور - أو ممكن أكثر - في فانكوفر....
ما هو أفضل معهد هناك ,
وماهي الأجواء هناك بعد عيد الفطر ,
وكم التكلفة التقريبية - علماً بأنني لا أحب التمشيات - .
وماهي طريقة الدراسة , أي هل تنتهي دراستي بوصولي لمستوى معين أم مع إنتهاء المدة ,
ومن خلال معايشتك للشعب الكندي , ما هو رأيك في تعاملهم , علماً بأنني رجل ملتحي ,
طولت عليك وجزاك الله خيراً.....
الرد على الاستفسار:
اخي :
فيما يخص الدراسة ودي لو تقدر تعطيني زيادة معلومات عشان اقدر افيدك اكثر:
-) هل عندك حد معين للميزانية.
-) وشلون لغتك الانجليزية الان.
-) ترغب في السكن لوحدك او مع عائلة كندية.
-) هل يهمك تتعلم اللغة الانجليزية على اصولها في الجامعات الكندية الحكومية ، مع العلم بان الدراسة عندهم صعبة ولكن جداً مفيده.
بخصوص باقي اسئلتك:
-) بعد العيد بيوافق نهائة الخريف و دخول الشتي ، بيكون الجو بارد و ممكن ينزل ثلج و لكن الجو مقبول بالمقارنة بباقي اجزء كندا.
-) انا عن نفسي ما شفت من الشعب الكندي الا كل احترام و محبة. شعب ودود و بشوش ، من ناحية اللحية ما اعتقد ان فية مشكله خصوصاً ان المسلمين بعداد كبيره و اللحية تعود الكنديين شوفتها على المسلمبن و الهنود السيخ.
-) اما انك ما تحب التمشيات ، انا اقول لك انك اول ما تشوف فانكوفير و جمالها تبي تموت في التمشيات.
-) طريقة الدراسة تعتمد على نوع المعهد او الجامعة بالاضافة الي نوع الدورة اللي انت بتاخذها ، بالاضافه الي مستواك الحالي في اللغة.
-) التكلفة تختلف على حسب المكان اللي بتدرس فية ، ولكن و بصفة عامه الدراسة مع السكن و المعيشة بتكلفك حدود 5000 ريال شهري.
************************************************** ************************************
بسم الله الرحمن الرحيم..
اود اخي الكريم ان استفسر عن المعاهد واسمائها في فانكوفر ...انا اريد معهد يكون بأسعار جيده ولايشترط ان يكون ذا مواصفات تعليميه عاليه لانني طالب في كليه اللغات والهدف الرئيسي هو الاحتكاك لتطوير مهارات المحادثه ...علما انني اريد ان اذهب لفتره بين 10 الى 12 اسبوع..
ولك جزيل الشكر اخوي على مجهوداتك الرائعه
الرد:
اخي
بما انك طالب لغات ، تبي تعرف المعلومات المذكوره على الرابط التالي :
جميع المعاهد و الجامعات التي تدرس اللغة الانجليزية في مقاطعة برتش كلومبيا الكندية.
طبعاً فانكوفير تقع غي مقاطعة برتش كلومبيا.
************************************************** ************************************
انا راجعت الصفحات السابقه قبل مااكتب الاسئله ولم اجد المعهد المثالي..
على العموم اخوي هل تنصحني بالتسجيل عن طريق النت او عن طريق احد الوكالات..وهل هناك فرق في الاسعار...
واذا مافي ازعاج اخوي الحبي ابغى اشوف رايك عن السكن واسعار هذا الموقع هل هي مناسبه ام لاwww.homestayvancouvercanada.com وهل هو موقعه جيد في المدينه..
واريد الله لايهينك رأيك في هذا المعهد هل تعتقد انه مناسب www.bodwell.edu/language/message.html
اسف كثيرا على ازعاجك اخوي اتمنى انك تتحملني والف شكر..
الرد:
اخي :
تعذرني على التاخير في الرد.
بالنسبة للسكن على مرين درايف فهو في واحد من اجمل مناطق فانكوفير الغربية ، و ايضاً من اغلا المناطق.
بالنسبة للمعهد انا الحقيقه ما اعرفه، لكنه موجود في وسط المدينه ، ولا تنساء ان مستواء المعاهد في فانكوفير كلها محكومه بمواصفات شديده من قبل الحكومه.
************************************************** ************************************
الصراحه انا معجب بالسكن رغم انه على حسب كلامك غالي شوي ...طيب ممكن اسأل عن المتوسط الاسعار للسكن مع عائله
وبالنسبه للمعه فالصراحه اعجبني وانت ريحتني بأجابتك
الف شكر على سعه صدرك
الرد:
اخي :
اسعار السكن مع هائلة كنديه تختلف من منطقه الي اخراء ، لكن المتوسط في حدود 500 ريال سعودي في الاسبوع. و السعر هذا يشمل 3 وجبات في اليوم.
************************************************** *************************************
جزاك الله الف خييير
انا لي فتره ونا اطري كندا في بالي
وكنت ادخل واسوي سيرتش عىل الجامعات اللي هناك
ناوي اكمل ماستر في مجال غير مجال (البكالريوس) يعني ناوي اخذ الماستر في شي جديد
وفكرت بالاستثمار او الماركتنج .. مجرد اراء من هنا وهناك
وبحثت ودورت ... لكن مالقيت الجواب الشافي من جميع النواحي
لكن موضوعك افادني افاده حلوة حيل
وودي اسالك انا ناوي اروح بس مو الحين !! بعد سنه بإذن الله
وش افضل الجامعات اللي تختص بالاداره بشكل عام ... وباي مدينه .. التكاليف(مصروف ((يومي او شهري)).. جامعه) .. وايش نظامهم لو يجي واحد بيدرس ماجستير بغير تخصصه (يعني من جديد) سمعت انه ياخذ ساعات معينه في كلاسات اساسسيه بالاداره بعدين يكمل ماستر طبيعي ..
انشالله النقطه تكون واضحه وتفسرها لي على مايتبعونه
الف شكر لك وعلى جهدك بالمنتدى ومواضيعك ومغامراتك اللي اتابعها
ونبي نصايح من هنا وهناك من كندا .
الرد على الاستفسار:
اخي :
اولا انا تشرفت بمرورك و تشريفك لموضوعي هذ.
الجامعات الكنديه كثر التراب ، لكن المنطقه اللي بتدرس فيها هي اللي بتفرق معك.
معضم انحاء كندا بارده في فصل الشتاء ، انا عن تجربه لقيت المدن الموجوده على الساحل الغربي و بالذات في جنوب مقاطعة برتش كلومبيا هي الافضل من ناحية الجو ، صحيح ان الشتاء برد لكن برد معقول.
مشكلة مقاطعة برتش كلومبيا انها تعتبر الاغلى في كندا ، لكن بكل صراحه تستاهل كل قرش يندفع فيه، فتعدد الاعراق البشريه فيها يجعل منها مدينه دوليه فما تحس بالغربه فيها كثير، بالاضافه الي ان شعبه يحترم اللي يحترمه و امنه بشكل كبير ، طبعاً بالاضافه الي جمالها الخلاب بكل ما تعنيه الكلمه ، انا اعتبرها اجمل مدينه في العالم.
اكبر و افضل جامعة في كندا و في فانكوفير الواقعه في مقاطعة برتش كلومبيا هي جامعة برتش كلومبيا (UBC) ، و هذا رابط الجامعة:
http://www.welcome.ubc.ca
عندهم عدد كبير من التخصصات اللي يقدمون فيها شهادة الماجستير ، و على الرابط هذا بتلقاء قايمة البرامج اللي يقدمون فيها الماجستير:
http://www.grad.ubc.ca/apply/progra...sp?sort=masters
اختر البرنامج اللي ودك تكمل فيه و انا ازودك بالمعلومات اللي انت تبيها.
انا اخترت الجامعه هذي لك لاني اعرف انها من افضل الجامعات ولكن من اصعبها ، بس صدقني اذا درست عندهم بتحس انك ما عمرك رحت للمدرسه من قبل.
************************************************** *************************************
عندي استفسارات كثيررر لكن بموضوعك جاوبت عليهم اكثر من مره ومن نواحي مختلفه بعد,,
لكن من ناحية العائله الي تسكن معها وش وضعهم يعني بيكونون شيبان وكبار بالسن اقصد الام والاب وايضا اعضاء الاسره الاخرين اطفال او باعمارنا؟
والغرفه الي بتنام فيها عندهم كبيره صغيره وهل تاخذ راحتك فيها يعني تحط اغراض شخصيه لاب توب ساعات...الخ وتقدر توضا وتصلي بشكل عادي ؟؟ والحمام وانت بكرامه خاص لي او مشترك
واذا كان السكن مع العائله شامل الاكل والشرب ابيك توضح يعني الاكل يكون بموعد محدد والا متى ما بغيت تفتح الثلاجه وتاخذ الي تبي وتاكله على الطاوله او في غرفتك ؟ ومن ناحيه التلفزيون تقعد تسنتر قدامه عادي .؟
واخيرا اذا صرت بتروح معك واحد تقدر تسكن انت واياه بنفس الحاره او بيت قريبين من بعض؟ لان صعبه تصير انت واياه روم ميت بتروح كلها سواليف ومافي فايده( لكن القصد علشان المواصلات تكون مع بعض الروحه والجيه)
الجواب على الاستفسار:
هوم ستي ( Homestay ) هو الاسم الذي يطلق على برامج اقامة الطلاب الاجانب مع عائلاة كنديه و هو ايضاً اسم شركه كنديه متخصصه في الشي نفسه، يمكن اكون افضل ما في هذا البرنامج هو اختلاطك مع الكنديين اللي يتكلمون انجليزي فتستفيد منهم بالطريقه هذي ، ايضاً بتتعلم منهم طريقة الحياة الكنديه و التراث الكندي.
طبعاً العوائل الكنديه اللي ترغب في انك تقيم معهم لازم يتقيدون بعدة شروط مهمه و هي :
1) لازم يامنون لك غرفه خاصه مع مكان خاص للدراسه.
2) منزلهم لازم يكون نضيف و يكون ذو بيه مناسبه للدراسه و الاقامه.
3) ثلاث وجبات يوميه ( طبعاً انت ممكن تختار وجبتين او وجبه واحده) ولازم تكون الوجبات هذي مناسبه لك.
4) لازم يامنون لك مكان تغسل فيه ملابسك و تلفزيون و تلفون ( لكن ماهو شرط يكون خاص ، ممكن يكون مشترك).
5) لازم تتكلم العائله اللي انت بتسكن معها اللغه الانجليزيه بطلاقه.
6) لازم يكون قريب من منزل العائله وسئلة نقل عامه ( باص او قطار كهربائي).
اغلب العوائل اللي يقبلون باقامة طالب اجنبي معهم هم بحاجه للدخل الاضافي او تكون عائله بحاجه لشخص يونسهم و يملا عليهم البيت ، مثل كبار السن المتقاعدين.
انا اعرف واحد من الشباب سكن مع حرمه عجوز مدة سنه كامله و كانت هي بلحالها ، يوم توفت كتبت له في ورثها 100000 الف ريال ، لانها حبته و اعتبرته احد عيالها.
انت ممكن تختار نوع العائلة اللي ترغب في السكن معها من ناحية الديانه او الاصل ( المقصود بالاصل يعني هم من وين قبل ما يهاجرون الي كندا) ، ممكن تختار عدد الافراد و اذا ترغب يكون عندهم اطفال او حيونات اللايفه.
طبعاً المعهد اللي انت تسجل فيه ممكن يؤمن لك السكن مع عائلة او ممكن انك تختار شركه متخصصه في اسكان الطلاب الاجانب مع عوائل كنديه و الشركه هذي تساعدك في اختيار المعهد او الكلية المناسبه للدراسه.
النضام الكندي يتيح للطالب الاجنبي الدراسه فيها لمده لا تزيد عن 6 اشهر بتاشيرة زياره اذا زادت المده عن 6 اشهر يكون الطالب ملزم بالحصول على تاشيرة دراسه.
سعر الاقامه في احد هذه المسكن هي :
غرفه صغيره ما فيها تلفزيون و تقل جحر ضب ولا فيها الا الضعوي : 600 دولار كندي ( 1800 ريال سعودي) في الشهر شامله 3 وجبات.
http://www.50005000.com/Homestay/DSCF0390.jpg
http://www.50005000.com/Homestay/DSCF0399.jpg
هذي غرفة النوم.
http://www.50005000.com/Homestay/DSCF0391.jpg
http://www.50005000.com/Homestay/DSCF0418.jpg
و هذا المكتب في الغرفة.
http://www.50005000.com/Homestay/DSCF0398.jpg
هذا دالوب الملابس في الغرفة.
http://www.50005000.com/Homestay/DSCF0403.jpg
هذي صالة البيت.
http://www.50005000.com/Homestay/DSCF0409.jpg
و هذا المطبخ ، ممكن تطبخ فيه بنفسك بس لا تنساء تنضفة بعد ما تخلص.
http://www.50005000.com/Homestay/DSCF0412.jpg
http://www.50005000.com/Homestay/DSCF0414.jpg
هذا الحمام و هو مشترك مع باقي اهل البيت.
http://www.50005000.com/Homestay/DSCF0405.jpg
و هذا المنظر من خارج بلكونتك الخاصه.
اسعار الشركه هذي كما يلي:
غرفه كبيره فيها سرير كبير ، بلكونه ، مكتب ، 3 وجبات يوميه ، تلفزيون و فديو و توصيلة انترنت : 950 دولار كندي ( 2850 ريال سعودي ) اذا كان عمرك اقل من 18 سنه ، او 850دولار كندي ( 2370 ريال سعودي )اذا عمرك بين 19 و 24 سنه ، او 790 دولار كندي (2550 ريال سعودي) اذا عمرك فوق 24 سنه. كلها في الشهر الواحد.
بالنسبه لاستفساراتك:
-) العوائل اللي يتسكن معها مختلفه ، انت ممكن تحدد نوع العائله اللي انت تبغاها ( انا افضل انك تسكن مع شيبان ، يمكن يجيك ورث من وراهم)
-) نوع الغرفه تعتمد على اختيارك و المبلغ اللي انت مستعد تدفعه كل شهر.
-) بالنسبه للصلاة ، فهذا شي خاص فيك ولا احد يقدر يتدخل فيه ، و انت ممكن تطلب السكن مع عائلة مسلمه.
-) اغراضك الشخصيه انشاءالله ما عليها مشكله ، و انت بتقفل غرفتك كل ما طلعت منها. لكن يفضل انك تحط اغراضك الغاليه في مكان امن ( البنوك) او تاخذها معك كا ما طلعت من البيت ، الاب تاوب ما عندك فيه مشكله.
-) الاكل دايم محدد في وقت يحددونه لك العائله بس هذا ما يمنع انك تطبخ لنفسك لكن بشرط تشتري مقاضيك بنفسك.
-) اذا ما عندك تلفزيون خاص في الغرفه فتقدر تتفرج على تلفزيون البيت زي ما تبغا بالاتفاق مع العائله.
-) ممكن خويك يدبر له سكن في مكان قريب منك.
************************************************** *************************************
انا ابغا ادرس في كندا الماجستير طبعا ابغا مدينة فانكوفر وتخصص الي ابيه (حكومه الكترونيه اوادارة الجوده او التحقق من الجود) وابغا لي جامعه معترف فيها وحليوه يعني ميب صعبه جدا الدراسه فيها فكرت في برتش كلومبيا وافادني احد الأخوان بأنها صعبه جدا الدراسه فيها
الرد على الاستفسار:
بالنسبة لجامعات برتش كلومبيا ، فهي الحقيقة تعتبر الاصعب و في نفس الوقت الافضل على مستوا كندا.
الجامعات المعترف فيها هي :
جامعة برتش كلومبيا (UBC)
و جامعة سايمون فريزر (SFU)
و هذا رابط فيه معلومات عن الدراسة في كندا بالاضافة الي المعاهد و الجامعات:
http://www.studycanada.ca/arabic/index.htm
************************************************** ************************************
أنا أعمل في مركز طبي ومن احتكاكي بالموظفين لا أقول أجيد ولكن يمكن أقول لك أطقطق معهم في اللغة وش تقدر تنصحني به ياخوك هل أسافر أم لا وفي حال شورك علي بالسفر ماهي المدة التي تنصحني بها
الرد على الاستفسار:
انا اشور عليك تأخذ لك دورة في بلدك لمدة كم شهر ، و بعد ما تحس ان لغتك تحسنت ممكن تروح فانكوفر او اي مدينة كندية اخرا و تأخذ دورة مكثفة لمدة 3 اشهر و انشاءالله بتستفيد منها.
لكن احص انك تبعد عن المعاهد اللي يتواجد فيها عرب باعداد كبيرة.
************************************************** ************************************
في زميل لي في العمل يبغى يروح لدراسة بكالوريوس حاسب آلي ولكن عمره تقريباً ثلاثين سنة ومستواه في اللغة الإنجليزية تقدر عليه 3.5 من أربعة هو حاصل على دبلوم برمجة حاسب آلي في عام 2000م تقريباً لكنه ضيع كل الي درسه ( كل الي درسه امسح من راسه ) والرجال هاوي دراسه بشكل مهوب بسيط وحتى الحين عزوبي ما أدري تقدر تفيد بشيء أو تنصحه بطريقه معينه ؟
هل يهمة ان الجامعة تكون معتمدة من وزارة التعليم العالي السعودية او لا ، و سبب سؤالي هو انه في بالي معهد متخصص في مواضيع التكنلوجيا و الهندسة بانواعها و انا نفسي درست فيه لكنه غير معتمد من وزارة التعليم العالي السعودية مع انه من افضل المعاهد الي تقدم البكلريوسو الماجستير في المجالات هذي.
اما بالنسبة للغة الانجليزية فنشاءالله ما فيها مشكلة ، لان اغلب الجامعات و المعاهد يدرسون الطالب انجليزي و يرفعون من مستواه و بعدين يخلونه يكمل التخص عندهم.
تكملة لللسؤال اللي فوق:
ما يهمه إن كانت معترفة من وزارة التعليم العالي ولا لا وطلب مني بعد التأكيد على مسئلة العمر والرسوم السنوية للدراسة
العمر ما عندك مشكلة فيه و ممكن تدرس لو عمرك 100 سنة
انا اشور على خويك بمعهد برتش كلومبيا للتكنلوجيا (BCIT) ، و هذا رابطهم على النت:
http://www.bcit.ca/international/
بالنسبة للبكلريوس في الحاسب الالي فالمعهد عندهم العديد من التخصصات و بتحصلها على الرابط التالي:
http://www.bcit.ca/path/computing/programs/
شف تخصص الحاسب الالي اللي يناسب خويك و و اضغط على الرابط حقة الموجود في الصفحة اللي بتطلع لك و بتحصل كامل المعلومات عن التخصص و تكاليفه و طريقة التسجيل في المعهد.
************************************************** *************************************
السلام عليكم ورحمة الله وبركاته
ابشركم وبعد انتظار طويل وفحص طبي الـــــــــــــــــخ !
طلعنا التأشيرة الكندية ووجهتي ان شاء الله الى فانكوفــر الى معهد pli وادعولي بالتوفيق
ذهابي انا لتعلم اللغة الانكليزية وبعد مشاورات اخترنا المعهد هذا ومن لديه تعليق على هذا المعهد يا ليت يقوله لنا والي يبي موقعه هذا هو :http://www.pli.ca/
انا الان اريد نصايحكم ماذا احتاج في سفري حتى لا اندم هناك هذا واريد نصائح من تجاربكم في فانكوفر
وما تنصحوني هناك بزيارة ماذا وما ذا تنصحوني بأي برنامج اقوم العمل عليه هناك في غربتي
ارجو من الله ان يوفقني انا وياكم بما ينفع
وشكرً
التاشيرة جاهزة وباقي نصائحكم
لا تنسون ان تدعولي بالتوفيق في رحلتي الدراسية
الرد على الاستفسار:
اخي :
الحقيقه انت ما استفسرت عن شي محدد ، يعني استفساراتك كانت عامه. اللي اقدر افيدك فيه هو ما يلي:
1) مر على الموضوع التالي و انشاءالله بتلقاء فيه معلومات كثيرع عن فانكوفير:
اشتقت لكي يا فانكوفير.
2) هذي بعض المعلومات عن مطاعم و اسواق فانكوفير و بعض المعلومات العامه:
الاسواق في فانكوفير و المدن التبعه لها:
سوق الميترو تاون (Metrotown)
عنوان السوق ( 4700 Kingsway) في مدينة برنبي.
ويقع في مدينة برنبي واللي هي تعتبر جزء من مدينة فانكوفير ، والسوق هذا يعتبر اكبر مجمع تجاري في فانكوفير و في مقاطعة برتش كلومبيا و يتكون من حوالي 460 محل ، يوم زرتة عام 1994 كان اسمه (سوق ميترو تاون و ايتون) كان سوق ايتون اللي كان جزء من ميترو تاون شاغل مساحه كبيره من السوق ولكن قبل كم سنه قفل و انتقل لم سوق ثاني في الداون تاون ، طبعاُ سوق الميترو تاون توسع و اضيف له مجمع ثاني اسمه (الميتروبليكس) ، الميتروبليكس هذا عباره عن حوالي 15 صالة سينما كبيره و مجمع العاب الكترونيه ( اركيد ) الاركيد يتكون من دورين و يوجد في داخله مطعم و كل لعبه الكترونيه تخطر على البال. بالاضافه للاركيد و صالات السينماء فيه مجموعه من المحلات من ضمنها واحد من اكبر محلات الادوات و الملابس الرياضيه.
يقع على طرف السوق فندق الهولدي ان وهو فندق 3 نجوم و فندق الهيلتون قطع الشارع عن السوق وهو 4 نجوم.
الي يحب يكون قريب من السوق يفضل انه يسكن في احد الفندقين هذي و بيحصل كل ما يحتاج له.
يوجد في السوق كل ما يحتاج له الشخص ، فيه البنوك و المطاعم و السوبرماركت و كل انواع المحلات ، صدقوني لمن اقول ان الشخص يحتاج الي اكثر من ثلاثه ايام عشان يدور كل ارجاء السوق ، بس الله يعينكم على الضياع فيه لانه من كبره يضيع.
سوق الباسفيك سينتر (Pacific Centre ):
عنوان السوق : تقاطع شارع هو و جورجا في الداون تاون (Howe and West Gerogia).
و يعتبر ثاني اكبر سوق في فانكوفير ، يتكون السوق من حوالي 200 محل موزعة على 3 ادوار ، افضل مافيه سوق ايتون الموجود على طرفه الشمالي ، سوق ايتون هذا عندهم ماركات ملابس خياليه ما تلقاها في اي سوق ثاني في فانكوفير..
مشكلة السوق هذا و اللي ضيق صدري هو عملية انك لازم تدفع فلوس مقابل استخدام مواقف السيارات.
لكون السوق في الداون تاون جمبه مجموعه من الفنادق و الاسواق الاخري ، طبعاً اشهر فندق جمبه هو فندق الفور سيسونز.
سوق اوكريج سنتر (Oakridge Centre )
عنوان السوق : 650 West 41st Ave فانكوفير.
موقع السوق على خريطة فانكوفير.
السوق يتكون من دورين و فيه حدود 150 محل ، السوق صغير مقارنه بالمترو تاون و الباسفيك سينتر ، لكن فيه شي ماهو في السوقين هذي ، فيه محلات مجهورات و تحف من البلور تاخذ العقل ، انا ما عمري شفت على كثر ما ادور اسواق المجوهرات شي زي اللي شفته في السوق هذا. يا ناس عندهم مجوهرات خيال ولا في الاحلام ، ولا تحف البلور و الزجاج يافيها تفنن ماهو في الدنيا هذي.
و تعذروني لاني الحقيقه ما لقيت صور للسوق.
طبعاً فانكوفير و المدن التابعه لها مليانه اسواق بس انا بصراحة ما جاز للي الا الاسواق الثلاثه هذي.
بعض المطاعم في فانكوفير:
-) مطعم جو فورتيز (Joe Fortes) وهو موجود في وسط المدينة (Downtown) ويقدم تشكيلة من الاكل البحري والايطالي وانواع المشويات. اكلهم رايييق.
العنوان : عنوان المطعم: 777 Thurlow Street, Downtown Vancouver
الموقع الالكتروني : مطعم جو فورتيز
-) مطاعم ايرل (Earls Restaurant ) ويقدم تشكيلة واسعة من الماكولات الغربية.
المطعم له عدة فروع في مدينة فانكوفير.
الموقع الالكتروني : مطاعم ايرلز
-) مطاعم ريد رابن (Red Roban) ، ويقدم تشكيلة واسعة من الماكولات الغربية وعنهم بطاطس مقلي واجنحة دجاج عجيبة. المطعم هذا له فرع عند سوق الميترو تاون.
المطعم له عدة فروع في مدينة فانكوفير.
-) مطاعم بوستون بيزا (Boston Pizza) ويقدم بيزا رايعة ومجموعة كبيرة من الماكولات الغربية.
المطعم له عدة فروع في مدينة فانكوفير. وله فرع عند سوق الميترو تاون.
-) مطاعم بوت هاوس (Boat House Restaurant ) ويقدم ماكولات بحرية متنوعة ورائعة.
المطعم له عدة فروع في مدينة فانكوفير.
الموقع الالكتروني: مطعم البوت هاوس
-) مطعم نرفانا (Nirvana Restaurant ) ويقدم ماكولات هندية رائعة ولازم تجرب.
عنوان المطعم:2313 Main Street at 7th Avenue
الموقع الالكتروني : مطعم نرفانا
-) مطعم الشلي كلب (Chilli Club) ويقدم ماكولات تالندية ممتازة وعنده كل يوم احد غدا بوفية مفتوح.
المطعم موجود في وسط المدينة على شارع هورنبي وجمب البحر.
-) مطعم مصنع المكرونة (The Old Spaghetti Factory ) مطعم اكلة ايضاً رائع من الاكل الايطالي والغربي.
عنوان المطعم : في حي مدينة الغاز (Gastown)
-) مطعم انتونز (Antonz) مطعم اكل ايطالي ، لا يفوتكم بقوة بس تاكدو انكم ما تاكلون اي شي في اليوم الي انتم ناوين تروحن لة فية لان اكلهم كثير وصعب انكم تخلصونه.
عنوان المطعم: هو على شارع هيستنق الشرقي (Est. Hasting) في مدينة برنبي ، ما اذكر عنوانه بالضبط لاكن ممكن تاخذ العنوان من دليل التلفون.
طبعاً فانكوفير كلها مطاعم من كل شكل ولون. وفية خدمة اسمها تيكاوت تاكسي (Takeout takes)
وهم عبارة عن شركة توصل لك الاكل من اغلب مطاعم فانكوفير الي مكان سكنكم . وتراهم ممتازين وعرفهم زين لاني اشتغلت عندهم.
انا من محبي الاكل الصيني والياباني واذا تحبون عطيتكم اسامي وعناوين مجموعة منها.
بعض المعلومات العامه عن فانكوفير:
-) اذا الواحد حب يستاجر سيارة لازم ياخذ معها تامين شامل على السيارة وليس فقط تامين ضد الغير لانه لو لا قدر الله وحصل حادث التامين ضد الغير بيغطي فقط اضرار السيارة الثانية ونت بتدفع اضرار السياره الي معك.
-) السياره ما تقدر تستاجرها الا ببطاقة ائتمان (فيزا ، ماستر كارد و ما شابة ذلك).
-)اذا استاجرت السياره بستخدام بطاقة ائتمان ذهبية ممكن يعفيك المحل الي تستاجر من السياره من دفع قيمة التامين اليومي على السياره ، وهذا طبعاً يعتمد على مصدر البطاقة.
-) خريطة مدينة فانكوفير الي على شكل كتاب صغير ممتازه ولا يمكن تضيع اذا كنت تعرف تقراها بشكل صحيح.
-)اغلب شوارع فانكوفير لازم تدفع فلوس مقابل الوقوف فيها. وسعر الوقوف يختلف من شارع الي اخر.
-) ما بين الساعة 6 الي 9 الصباح و ما بين الساعة 3 الي 6 بعد الظهر يكون وقوف السيارات ممنوع في اغلب الشوارع و بالذات في وسط المدينة حتي لو كنت دافع فلوس مقابل الوقوف ، واذا نسيت توخر سيارتك من الطريق الي فية الوقوف ممنوع في الاوقات هذي الله يعينك على المخالفة والله يعينك تروح لم الشركة الي سحبت سيارتك و تدفع لهم قيمة السحب.
في مواقف السيارات الجانبية الي ما تكون على الطرق الرئسية يمنع الوقوف فيها بعد الساعة 12 باليل الي الساعة 6 الصباح.
-) قبل ما توقف سيارتك في اي مكان اقراء اللوحات وتاكد انه ممكن توقف سيارتك و الاوقات الي ممكن توقف فيها.
-) في وسط المدينة من الصعب جداً انك تحصل موقف للسياره و اذا حصلت موقف فهو في العاده غالي.
-) ممكن الواحد يستخدم وسايل المواصلات العامة مثل الباص و و القطارات الكهربائية الي تمشي فوق جسور خاصة على ارتفاع حوالي 8 متر من الارض.
-) اذا استخدمت الباص قيمة المشوار تعتمد على المسافه الي انت ناوي تقطعها ، اقل مشوار قيمتة دولار ونصف ، و اول ما تركب الباص فية صندوق جمب السواق تحط الفلوس فيها ، و لا تتوقع السواق يصرف لك اذا ما معك فكة مناسبة.
-) ذا استخدمت القطار الكهربائي لازم تشتري لك تذكرة من مكاين موجودة عند كل موقف للقطار ، وعرف انه ما فيه على القطار شخص ثابت يفتش على التذاكر ، يعني ممكن تكمل مشوارك واكثر من مشوار مندون ما يسالك احد عن تذكرة ، وممكن في اول مشوار يجيك واحد لابس ملابس شركة القطار ويسالك عن التذكرة واذا ما معك تذكرة او التذكرة الي معك ما تغطي المشوار الي انت قاطعة الله يعينك بتاخذ مخالفة و ممكن يودونك للشرطة.
-) اذا اكلت في مطعم او ما شابة ذلك يكون من الافضل انك تعطي بخشيش في حدود 5% من قيمة الفاتورة.
-) عندما يكون معك سيارة لازم تعرف ان الدوران للخلف بالسيارة ممنوع منع بات واذا ديورت ممكن تاخذ مخالفة ، اذا احتجت تديور ادخل احد الحارات وديور ورجع للخط الي انت تبية.
-) اذا معك سيارة و وصلت الي تقاطع رائسي او فرعي ولا فية اشارة فعرف ان اول واحد يوصل للتقاطع هو اول واحد يعدي التقاطع.
-) اذا معك سيارة وتمشي في خط مكون من اكثر من مسار وفجاة واحد من المسارات كان مسدود وحبيت تغير مسارك بعد ما توقف فعرف ان السيارات تبي توقف لك عشان تعدي ونت لازم تسوي زيهم.
-) اذا كانت اسنانك ماهي مضبوطة وتبي علاج عالجها في ديرتك لان عيادات الاسنان عندهم غالية جداً.
-) اذا تتعاطي علاج معين خذ معك الي يكفيك من بلدك لان العلاج عندهم لازم بوصفت طبيب.
-) اذا انت تدخن خذ معك الي يكفيك من الدخان لان الدخان الي عندهم ما هو نفسة الي في بلدك وتبي تشوف دخان غريب اول مرة تشوفة و نسبة النكوتين فية منخفضة جداً.
-) اذا جيت تشتري دخان اعرف انهم بيطلبون منك اثباتك الي يوضح فية عمرك.
-) اذا اخذت معك دخان كثير من بلدك اعرف انهم بياخذون منك ضريبة على الدخان هذا.
-) اذا جاك واحد في الشارع وطلب منك زقاره لا تعطية الا اذا انت متاكد انه فوق 18 سنة ولا ممكن تحاكم اذا مسكوك.
-) اعرف ان اغلب الهامبرغر عندهم ما يكون لحم بقر صافي و يكون مخلوط مع لحم خنزير.
-) اعرف ان البيتزا عندهم يكون فيها لحم خنزير اذا كان فيها ببيروني او سجق بالاضافة طبعاً للهام او البيكون.
-) اعرف ان البطاطس الشبس عندهم اغلبها فيها مشتقات من الخنزير.
-) اعرف ان اقصي سرعة عندهم في شوارعهم هي 50 كم في الساعة ، و اذا تعديت السرعة هذي بتاخذ مخالفة وقيمة المخالفة تعتمد على سرعتك عندما يصيدونك.
-) اعرف ان اقصي سرعة للسيارة في المناطق الي تكون حول المدارس هي 30 كم في الساعة اوقات الدراسة الرسمية.
3) المعهد اللي انت تتكلم عنه موجود في منطقة وسط المدينه (الداون تاون) على شارع بورارد ، المنطقه زحمة شوي و لكن هذا طبع كل وسط مدينه ، و الحقيقه ما عندي معلومات عنه.
الرابط التالي هو لصوره حيه و على الهواء مباشره لجسر بورارد في اتجاه وسط المدينة (الداون تاون) ، في نهائية الشارع بتلقاء المعهد حقك. الصوره هذي يتم تحديثها كل 15 دقيقه الين تضلم الدنيا ، فرق التوقيت بين السعودية و فانكوفير هو 11- ، يعني الساعة هندهم الان 8:45 في الصباح.
صوره مباشره من فانكوفير.
4) الجو في فانكوفير و الي السته ايام القادمه جميل و درجة الحراره في حدود 12 درجة مئوية و امطار كثيفة ، بس لا تخوفك الامطار ، فانكوفير دايم فيها مطر.
و هذا رابط يوضح لك درجة الحراره في فانكوفير لمدة 6 ايام قادمه و يتم تحديثه كا ساعة:
الطقس في فانكوفير
لا تشيل هم السفر الي فانكوفير ، انا متاكد انك بترتاح فيها و بتنهبل على جمالها، يمكن تتضايق في البدايه الين تتعرف لك على بعض الاصدقاء ، بس انشاءالله بعد كذا بتسلك معك الامور.
************************************************** *************************************
اسمع يالطيب
بصراحة انا ودي اروح لكندا وطبعا ما اقدر اروح كذا لازم ادبر لي عذر
والعذر بيكون دراسة
ما ادري يمكن القى دراسة لمدة قصيرة او لمدة طويلة لكن ايام قليلة بالاسبوع وياريت تكون 3 ايام
واظن نظام القيادة عندهم عادي مثلنا ماهو بالمعكوس ( انواع الحوادث بالتقاطعات)
ويمكن القى مدرس او يستحسن مدرسة خصوصية
لو بحثت عن فندق كم بتكون التكلفة بالشهر لفندق 5 او 4 نجوم
والفيزة للطالب تقدر تتنقل بها بالبلد عادي ولا لا
المعاهد تحاسب على الغياب ولا عادي
اللي بيروح كندا ما افضل طريق من الشرق ولا الغرب
وش اسوي كل محل اروح له احبه و اعشقه ، قلبي رهيف.
اجل متغوص ، لازم تجيب عذر ، اييييه يا الدنيا.
المهم ابعطيك اللي عندي و الباقي عليك.
شف سالفة انك تدرس فقط 3 ايام في الاسبوع ، ما اعتقد تمشي على السفاره الكندية و اكيد بيشوتونك.
انت خذ دراسه يوميه بمعدل 2.5 ساعة في اليوم خمسة ايام في الاسبوع ، او انت وش خسران خذ دراسه 5 ساعات في اليوم و خلهم يعطونك قبول و اول ما تاخذ الفيزا و تاصل فانكوفير امحطهم ركبه و لا تروح للمعهد ، او رح للمعهد و غير خطتك الدراسية او حتي غير المعهد ، في النهائه كل اللي انت بتخسره هو مبلغ 100 دولار كندي (300 ريال) قيمة التقدم بطلب التسجيل ، هو اهم شي للفيزا خطاب القبول.
و المدرسين الخاصين كثير و بتلقا منهم واجد ، لاكن اذا تطيع شوري وش تبي بهم ، اللغة و بتتعلمها من الاختلاط بالكنديين.
و اذا انت خايف تورط في الديره من ناحية الانجليزي او التجول ، تراني فاضي الين شهر 4 كان تبي خوي و دلوله ، بس ترا المصاريف عليك.
من ناحية الفندق و السكن ، السعر يعتمد على الموسم اللي بتسافر فيه ، يعني في الربيع و الصيف الفنادق غالية بسبب كثرة السياح.
بعدين انت تعال الاخ ولد نعمة ما يسكن الا في فنادق 4 او 5 نجوم ، الضاهر انت فنادق الفنس ماثره عليك ، ترا الفندق الكندي ابو نجمة يعادل فندق 4 نجوم في ديرة الفنس.
انت خذ لك غرفة في موتيل ( اللي غرفة على الشارع على طول) و بتطلع عليك في مثلاً البيست ويسترن بسعر 200 ريال في اليوم ، او رح للفندق اللي انا سكنت فيه و اول ما تاصل الفندق قابل راعية الهندي و قله انك خوي اسبرانزا و بيعطيك الغرفة بسعر 4000 ريال في الشهر ، و اذا قالك بشرط ما ينضفون غرفتك الا 3 مرات في الاسبوع قله عاد من زين هندياتكم اللي ينضفون ، بعدين رح و قردن الهنديات و عطهن دولارين و يلحسون لك غرفتك لحس.
و اذا انت مصر على 4 نجوم فيه فندق الهلتون سعر الليله عندهم بسعر 500 ريال و موقعهم حلو.